New Era Newspaper

New Era Epaper
Icon Collap
...
Home / Ava tave lihumbata nai nava shikule omunwe …Shikongo ta ti ovapolifi otava fifa oshiwana ohoni

Ava tave lihumbata nai nava shikule omunwe …Shikongo ta ti ovapolifi otava fifa oshiwana ohoni

2023-11-03  Festus Hamalwa

Ava tave lihumbata nai nava shikule omunwe …Shikongo ta ti ovapolifi otava fifa oshiwana ohoni

ONGWEDIVA - Kakukutu komatanga opolifi Inspekta General Joseph Shikongo okwa ti keshe omunambelewa wopolifi te lihumbata nai ota tewa mo moilonga molwaashi okatendo kopolifi oka yela. 

Edi Shikongo okwe di popya e likwatelela koshikumungu shomupolifi Valentino Endjala oo vati a denga omukainhu waye e li meteelelo leemwedi nhatu. 

Onghee Shikongo okwa ti ombelewa yaye itai ka fiya emanya la londa kulikwao kombinga yovapolifi itave lihumbata nawa. 

Endjala okwa kufwa moilonga konima eshi okavidio kaye ta denge omukainhu ka tandavela komalungula. Otaku hokololwa omulumenhu oo okwa denga omukainhu waye shaashi vati kwa li ta holwa komulumenhu umwepo. 

Shikongo okwa yelifa ta ti Endjala okwa dopa okulandula outendo veemhango va tulwa po kombinga yomalihumbato ovapolifi. 

“Endjala ita dulu okukala oshilyo shopolifi. Okwa longa oshilonga tashi ulike efano lii notashi fifa ohoni moshiwana. Onghee onde mu kufa moilonga opo a ninge oshihopaenenwa shavakwao,” Shikongo ta ti. 

Kakukutu wopolifi okwa ti ovapolifi nava ulike oshihopaenenwa shiwa moshiwana molwaashi ohava longo nokutula po elandulafano nokukaleka po eameno loshiwana. 

“Omupolifi ina pumbwa okukala ta kolwa e li meendingosho a djala omudjalo woilonga. Omupolifi ina pumbwa okukala ta kufa ombinga moilonga ya nyika oumbudi ile ta ningile ovanhu omahepeko oukashikekookanhu,” ta ti. 

Omaandaha, komutumba woshikonga shokukandeka oimbuluma, Shikongookwakumaida ovanambelewa vopolifi opo va fimaneke oshiwana, okulihumbata nawa, nokukaleka po eameno loshiwana. 

Okwa lombwela ovapolifi opo va fimaneke ovanhu aveshe nokupopya nawa noshiwana ngeenge tashi ka konga omayakulo opolifi koitaashi. 

Lwopokati opo, Shikongo okwa kumaida ovakainhu opo va xulife po okuamena ovalumenhu vavo ngeenge tava ningilwa omahepeko omomaumbo. 

“Otwa didilika ovakainhu ovapolifi navo va ninga oihakanwa yokudengwa kovalumenhu vavo ashike kave hole okulopotela opolifi,” ta ti. Onghee omunhu keshe ta ningile ovanhu omahepeko omomaumbo na lopotwe opo a pewe ehandukilo lopaveta molwaashi eshi otashi kwafele okushunifa pedu omahepeko oukashikekookanhu. 

fhamalwa@nepc.com.na 


2023-11-03  Festus Hamalwa

Share on social media