Bayahi bakomponi ya naikahela ya Goreangab mwa Katutura, baba yahile mwamilapo batutiselizwe kwalibaka zelumbile, kasamulaho akunanuha kwamezi atiswa kipula yezwelapili kunela. 

Bayahi babalikana 127, nebakalile kututela kwalibaka zepahami viki yefelile Lasabata. Muyemeli wa silalanda sa Samora Machel Nestor Kalola, nabulelezi New Era kuli nakupile katengo ka muleneñi wa Windoko kutusa kututisa bayahi, sihulu bao babayahile mwamilapo ni mwalibaka zetiba kubaisa kwalibaka zelumbile.

“Neli taba yaputako mi nimano zibiswa feela kibayahi, neni ile kwababeleki bakatengo katolopo bane ba ezize kamanyamenyame kulumelela batu kuli batutiswe. Nelu batutiselize kwalibaka zene sina miyaho ze kenisizwe kuli lupuluse libyana zabona,” nabulezi. Kalola napatuluzi kuli neba sika kandeka ni limembala zena ni kufiwa sibaka seo, kakuli nekusina nako. 

“Nelusika kandeka ni batu kakuli mubu usali wa katengo katolopo, batu kaufela bapila teñi isi kamulao. Kono batu baswanela kutusana kuli lupuluse mioya, ya babali mwakozi ya kukukiswa ki kububa kwamezi,” natolokile.

Membala yapila mwasicaba ili mulwaneli wa sicaba Jeremia Haipinge naize taba yakututisa sicaba kiya kale. Kono nabilaezi kuli taba yeo ikaswana yatisa mifilifili. “Batu batilo yaha famubu one ubeezwi babañwi, kanako yacwale bapila mwasabo kuli bañi bamubu bakataha kubona kufita kutalimana ni katengo katolopo, ni sikiliti bane bangile buiketelo,” nabulezi. New Era haipotela libaka zeo neilo fumana batu basasweli kuyaha, mi nebaitumezi kwa katengo katolopo kubaisa teñi.