Marythar Kambinda

Nyakalalo nebonahalile mwamakululu aKatima Mulilo ni sikiliti kaufela sa Zambezi Lamubulo, kasamulaho akukuta kwasikwata sa mbola ya mautu sene situzi mwakomoki ya mutende waNamibian ya 2022. Sikiliti sa Zambezi nesiile kwakwinano yasilimo se inge sinyazelezwa, kono nesikonile kukomokisa sicaba kakunwisa sikiliti sa Kavango ya Upa limbola zepeli kailiñwi (2-1), nikunanula komoki yamutende waNamibian lapilli, kasamulaho apapali yene tabisa hahulu kwalibapalelo la Oshakati Lasunda viki yefelile. Tulo yabona ne utwilwe mwanaha kaufela, sihulu mwasikiliti sa Zambezi, teñi myanda yabayahi basikiliti neba kamuhezi mwamakululu kuyo amuhela limbela zasikwata sene situzi.

Tibelelo yamwamakululu ne etelezwi kilimembala zakatengo katolopo, ni limembala zeñwi zabutokwa mwasikiliti sa Zambezi, bane bakulisize komoki mwamakululu atolopo. Hane abulela kanako yaku amuhela sikwata muyemeli watolopo ya Katima Mulilo Lister Shamalaza, nasakoni kupata tabo yahae hane alumba sikwata kakubonisa bundume nikutabisa sikiliti. “Kitompo kumi amuhela hape mwasikiliti. Neli Labulalu hane lafuyauzi sikwata ni neulonyana kumitusa kuitukiseza kwinano. Nemuizo eza hande sina mone mulusepiselize, mi luikumbuta musebezi one muezize. Kaufela luna lwa menya kakuli mubeile Zambezi fa mapa kakuli nemuyemi kakutiya ni kutula,” nabulezi. Yomuhulu wasikwata Lennox Kanyehu natezi tabo kasamulaho akufita kwasikwata mi naize: “Nelu ile ni sepo. Nelu bile ni mulelo mi nelu boni kuli watalelezwa. Neluize luka tisa komoki kwahae mi nelu ezize cwalo.” Beckson Sibeso Musipili ili yana ketilwe kuba muswali wakwinano, natabile hahulu kubona kamuhelo yende yene bafilwe mwasikiliti. “Niikutwa kutaba kuba muswali wakwinano, kakuli neli lwapili kubapalela sikwata sa sikiliti. Neli musipili omutelele mi nibata kususueza bababapala mbola yamautu, sihulu babanca kuli bakashe katata kufita famayemo abatabela,” nabulezi