OBank of Namibia (BoN) oya yambidhidha oshikondo shuuhaku niikwathitho nosho wo iigamenitho koCovid-19 i na ongushu yoN$500 000 moshitopolwa shaMusati.
Iilongithomwa mbyoka oya gandjwa Etiyali, koshipangelo Outapi notayi ka topolelwa iipangelo nuupangelola wa yooloka moshitopolwa. Sho ya gandja iikwathitho mbyoka, omunambelewa omukuluntu koshikondo shi lile po iifuta koBank of Namibia Barbara Deyer, okwa ti ombaanga oya yambidhidha niikwathitho yomashina nelalakano okulwitha omukithi goCovid-19.
“Otwa li twa ndhindhilike omaupyakadhi ga li ga taalela iikondo yuuhaku moshilongo, omolwoluhepo lwiilongitho, omashina unene mekuthikuthi lya ziko, ndyoka Etitatu,” ta popi ngaaka. Ta ti, shoka okwa li sha ethitha ombaanga onene, opo yi topolele omandiki guuhaku miitopolwa ya yooloka moshilongo niikwathithi yongushu oomilliona N$11 ayihe kumwe.
“Ekuthikuthi Etitatu, otwa kanithila mo oomwenyo dhaamwameme oyendji, onkene shoka inatu hala shi holoke mekuthikuthi tali popiwa tali ya. Iipangelo nayi ka longithe noku yakula aanumvu taya kwatwa komikithi ndhoka mbala,” ta kumagidha ngaaka.
Deyer okwa kumagidha oshigwana shi ka tuntilwe, ta ti, etuntilo otali hupitha oomwenyo odhindji, onkene ngele ope na ngoka natango te li henuka, na thikame nena.
Iikwathitho ya yambidhidhwa nayo kombaanga onene yaNamibia ongaashi: vital sign 16, 10 liter oxygen concentrator oolitela ne, omapakete ge li 11 go-MVA Immune boosters omapakete kehe limwe li na iikende wu li 150, oxygen nasal cannula ge li gaali, humidifier bottles gaali oshowo omashina gaali ga gwedha po giifudhitho.
Omupehakuluntu goshipangelo shOutapi Haziel Pindukai Masevere okwa li a pandula ombaanga onene yaNamibia sho ya yambidhidha niikwathitho mbyoka.
“Okupandula itaku gwana, ashike shoka ya longela oshigwana shaNamibia otashi ulike ohole nohokwe ombaanga ndjoka yi na noshigwana shasho,” ta ti ngaaka.
Ta ti, shoka ya ningi inaye shi hulitha po, ihe naya tsikile okulonga iilonga yoludhi ndoka, unene pethimbo ndika oshilongo sha taalela ombepo ondhigu yomukithi goCovid-19.
Masevere ta ti, omukithi ngoka otagu dhumwa gwa pita ko, onkene ota kumagidha oshigwana shi gwanithe po omalandulathano oshowo oompango okukeelela omukithi ngoka. – vkaapanda@nepc.com.na