Yamwe yomaakalimo yomoshitopolwa shaHangwena oya ti, elongelokumwe nombili momagumbo gawo olya teka mo omolwoongeleka tadhi taandeleke oohapu dhiifundja kutya otaya lyaathana momagumbo.

Omunambelewa gwopolisi omukuluntu miipambele yokugandja omauyelele moshigwana Christine van Dumen Dafonsech  Etiyali okwa li a ponekele oshitopolwa shaHangwena nokupatitha oongeleka ndhoka itaadhi longo moshili.

Ongeleka ya tseyika nawa mOshikango yedhina True Gospel of Salvation, yapastoli a tseyika nawa nedhina Commanda Erickson Festus oya patwa sho anuwa ya adhika naantu haya lala mongeleka omanga yamwe ya li ya lombwelwa ya hulithe po okunwa omiti dhawo. “Oshike mu na okulangeka aanumvu mongeleka, ehala ndika ongeleka nenge oshipangelo? Otamu longo iilonga ya puka, otamu pukitha oshigwana,” Dafonsech ta nyenyeta ngaaka.

Ta ti, ye ke na uupyakandhi nongeleka tayi galikana moshili yo ya landula omilandu dhi li mondjila. “Oshike ongeleka yi na okugandja omilalo, yo tayi lombwele aanumvu kaaya nwe omiti dhawo, otaya eluka ngiini, inamu fundja we aantu, “ta kumagidha ngaaka.

Dafonsech okwa li a kwata ko omambo agehe oshowo uukalata niinima kwa li tayi landithwa posheelo shongeleka esiku ndyoka.

Omukiintu gomimvo 21 Rachel Shaangano ngoka a li adhika mela limwe lya kwatathana nongeleka, okwa ti okwa lombwelwa a hulithepo omiti dhe.

“Onda kala ndi na uunkundi womadhiladhilo, ihe sho nda etwa mongeleka muka, omiti dhandje kandi shi mpoka dha ningine,” ta hokolola ngaaka.

Ta ti, oha hiti osikola kOngwediva koshiputundhilo shopombanda Internatinal University of Namibia (IUM), hoka ha yi kehe esiku ta zi pongeleka mpoka.

Kundana sho a li a yi mehala moka hamu lala okanona hoka, kalya li tali hokitha nando. 

Olyi na ezimba edhigu itaali ku litha noshikulya, noombuku tadhi tondoka ela alihe. Shaangano okwa ti, oya li mo oyendji haya lala mela moka, ihe yamwe oya  lalekwa mo omasiku ga piti.

“Ondu uvite nawa sho tandi yi kegumbo, mehala muka omwa kaka, ngame kandi hole ehala lya kaka. Ondi hole shili omagalikano nokwiimba ihe onkalo oya nyaika,” ta ti ngaaka.  Ta gwedha po ta ti, okwa li a falwa mehala moka kuyina ngoka e li ngaashingeyi kOmbaye .  “Meme oha thigi a landela ndje iikulya oshowo oshimaliwa sholefa okuya kosikola,” ta popi ngaaka.

Okwa li nda itaala okukala mehala ndika nando kanda li  nde li nyanyukilwa oshoka onda li nda lombwelwa kutya, otandi aludhwa komagalikano.

Yina yokanona sho a li a dhengelwa kuDafonsech okwa li a itaala kutya, na tume ko  okanona ke kosasiona yaShikango, ihe inaka galukila  we pongeleka mpoka.

Omukulupe ngoka anuwa a kala oomwedhi mbali ta lala mongeleka moka, okwa li a tindi tango okuya kegumbo lye, ta ti, anuwa ota zi po ashike ngele Erickson a thiki po puye.

“Omu shi sho twa kundathana naErickson, ano oshike mu na okukondjitha ndje? Ngame itandi z ipo mpaka, mehala muka ohandi kothele mo nawa” ta nyenyeta ngaaka.

Ta pula omwanamati ngoka a li e mu ila ko kongeleka ta ti, okwe mu tumwa kulye, oshike ye na oku mu ila po pegumbo lyOmuwa, oye mu halela shike?

Nonando pwa li iiti tayi teka okufala omukulupe kegumbo lye, Dafonseca okwa li e shi pondola.

Dafonsech okwa li a pata natango ongeleka yimwe momukunda Omupindi moshitopolwa shaHangwena.

Oshigwana shi thike po50 osha li sha gongala pegumbo mpoka hapu ningilwa ongeleka, tashi ti ngele omusita ngoka ita zi mo momukunda moka ota ka ningilwa omiyonena. Aanamukunda oya ti, oya loloka omagumbo gawo  taga teka po omolwongeleka ndjoka, sho anuwa tayi lombwele aanamukunda kutya otaya lyaathana. Pastoli gongeleka Full gospel of God, Heita Simon esiku ndyoka okwa li a lombwelwa a shune komukunda gwawo oshoka ota halakanitha omukunda.

Dafonsech okwa li e mu fatulile nkene oongeleka dhi na okulonga, omilandu oshowo oompango.

“Omunona omushona wu thike mpoka, ihe oto topola aantu momagumbo noohapu dhiifundja? Pehala wu tsikile osikola ecto ka kala omwiithwana gontumba ecna oshilonga moshigwana,”ta kumagidha ngaaka.

Pastoli ngoka ha ningile ongeleka ye kohi yomuti, pooha dhegumbo lyopashiwambo, okwacli a shunithwa komukunda gwawo, nokwa li a lombwelwa kaagalukile we momukunda Omupindi oshoka ota pukitha oshigwana.

Aanamukunda esiku ndyoka okwa li taya ligola ya nyanyukwa omanga yamwe taya imbi taya ti, ‘uundhigu wa zi mo momukunda gwawo’, yo  taya pandula Dafonsech.

– vkaapanda@nepc.com.na