Omulumenhu weedula 38 oku li moshipangelo shaShakati monghalo ii konima eshi a ponokelwa kovakwashiwana nokudengwa noikulumbwati noshoyo needopi.

Oshiningwani eshi osha ningwa mexuliloshivike komukunda Ohamwala moshitukulwa shaMusati efimbo lokomatango.

Omulumenhu okwa lemanekwa komutwe noshoyo mokanya omayoo aye okwa teka mo vati.

Omukonakoni woimbuluma wopolifi moshitukulwa shaMusati Omupedu Commissioner Moses Simaho okwa hokolola ta ti nakuninga oshihakanwa okwa dengwa pehe na etomeno kutya okwa ninga shike vati.

Vati nakuninga oshihakanwa manga ta ende okwa mona ashike eshi a ponokelwa kovakwashiwana ndele tave mu lafa oupuka noikulumbwati.

Okwa twalwa koshipangelo shaOutapi nokonima okwa tuminwa koshipangelo shaShakati opo a ka mone epango lopaunamiti.

Opolifi oye li pyakidila nokukonga ovafekelwa konima eshi va faduka po.

Lopokati opo, omulumenhu weedula 19 naye oku li moshipangelo shaShakati konima eshi a tuwa nombele yokapi komukunda Okamwandi moshitukulwa shaMusati.

Opolifi oya hokolola tai ti nakuninga oshihakanwa okwa tuwa nombele medimo konima eshi kwa li tava tanguna.

Omufekelwa ina kwatwa po shaashi okwa faduka po konima eshi a longa oshimbuluma.

Omakonakono opolifi otaa twikile moibofa aishe yonghendabala yedipawo.

– fhamalwa@nepc.com.na