Omulumentu gwomimvo dhopokati oku li monkalo ombwiinayi, sho anuwa a itete omuligu momuhandjo gwopolisi mehuliloshiwike.

Omulumentu ngoka otaku hokololwa e li moshipangelo shaNandjokwe.

Sha ikolelela kolopota yopolisi, oshiningwanima shoka osha holoka ongula yEtitano posasiyona yopolisi mOnayena moshitopolwa shaShikoto.

Otaku hokololwa kutya omulumentu ngoka okwa li a itete omuligu ethimbo a li a igandja kopolisi, sho anuwa a li a patululilwa oshipotha shomahepeko kukuume ke komiihole.

Pethimbo anuwa omulumentu ngoka kwa li ta pulwaapulwa kopolisi, okwa li a indile epitikilo opo a ka popye nongodhi pondje.

Konima yominute omishona sho a yi pondje, aapolisi oya tala mpoka e li, ashike oya adha nale e li metika lyombinzi. Okwa li a falwa koshipangelo meendelelo.

Opolisi inayi gandja uuyelele kutya omukiintu ngoka a patulula oshipotha okwa li a hepekwa pamukalo guni. 

Opolisi kakwa li anuwa ya mono ngele omulumentu ngoka oku na omwele, nelalakano lye okwa li lyashike oku ka popya nongodhi pondje.

Moshiningwanima inaashi faathana omukulupe gwedhina Mariane Kapande Hausiku (71) oshowo nomonamati gwedhina Anton Athanasius Matamu (36), oya li ya adhika ya sa megumbo lyawo.

Opolisi oya ti, oshiningwanima shoka osha holoka momukunda Mateke moshitopolwa shaZambezi, mehuliloshiwike.

Otaku hokololwa kutya omulukupe ngoka okwa li a nyenyeta kombinga yontulo tayi pi okupendukila esiku lyoshiningwanima.

Shoka anuwa kwa li sha pendula omonakadhona ongula a pule yina nkene a lala po.

Sho anuwa a piti ondunda yayina yokulala, okwa li a itsu molutu kaalu na mwenyo.

Nelalakano anuwa lyokutaandeleka onkundana ombwiinayi komumwayinamati, natango okwa li e mu adha kee na omwenyo, mondunda ye yokulala.

Otaku hokololwa kutya natango kape na uuyelele wothaatha shoka sha etalela omaso gaapambele mboka yaali.

- vkaapanda@nepc.com.na