New Era Newspaper

MTC Shares
Icon Collap
...
Home / ECN itukiseza liketisa zeketahani zaKatima

ECN itukiseza liketisa zeketahani zaKatima

2021-08-02  John Muyamba

ECN itukiseza liketisa zeketahani zaKatima
Top of a Page

RUNDU – Katengo kakabona zaliketisa mwanaha Namibia (ECN), kabulela kuli kaitukiselize kuzamaisa liketisa zeketahani mwasilalanda sa Katima Mulilo yatolopo la 25 Muyana. Baipapati basilezi bakalwanela kukambama fasitulo sene sikwaluhile kulatelela lifu la muyemeli John Mukaya. Mukaya yene ili muyemeli wakopano yaSwapo, natimezi fakozi yafamukwakwa mwakweli yaKandao unumwaha. Mulao ubulela kuli liketisa lina nikuezahala mazazi amashumi alobañwi situlo sisaba feela mukungulu. 

“Ninyatela kuli ECN itukiselize kakutala kuzamaisa liketisa zeketahani. Kamaniti, luse lufelize liñolisa zañambekelo zabaketi ili zene ezahezi kukala la 21 kuisa la 23 Mbuwana. Kanako yacwale luna ni baketi babaiñolisize babalikana likiti zelishumi ne, kamianda yemibeli ni mashumi asilezi kabababeli (14 262),” nekubulezi muzamaisi yomuhulu wakatengo kaECN Theo Mujoro. Nabulezi hape kuli liñolisa zañambekelo limano feela, nebafile nako yakutisa lipilaelo, kono hakuna lipilaelo zene liamuhezwi. “Kanako yacwale lupatehile kunyatisisa buka yaliñolisa, pili isika hatiswa kale,” natolokile.

Kuna ni baipapati babaikemezi ili Poniso Kubwima ni Gibson Nkando. Kopano ya IPC iyemelwa ki Lynnet Malipa, PDM iyemelwa ki Matengu Mweti, Chripher Simasiku uyemela kopano ya NDP mi Kennedy Simasiku uyemela kopano yaSwapo. Nabulezi hape kuli kuka latelela kupanga pampili yabaipapati, hamoho cwalo ni kufa lituto kwalitwela zalikopa, bazamaisi baliketisa ni limembala zasipokola, mi lituto zeo likafiwa kukala la 19 kuisa la 21 Muyana. Nabulezi hape kuli katengo kakazwelapili kufa lituto kwasicaba kuli la 25 Muyana halikafita, sicaba kaufela saziba libaka zakuyobotela ni nako yakukwala ni kukwalula.


2021-08-02  John Muyamba

Share on social media
Bottom of a page