New Era Newspaper

New Era Epaper
Icon Collap
...
Home / Eefikola 234 mOhangwena ohadi havala etete

Eefikola 234 mOhangwena ohadi havala etete

2022-07-25  Festus Hamalwa

Eefikola 234 mOhangwena ohadi havala etete

Eefikola 234 di na eendodo dopetameko mOhangwena odi na opolongalama yokutelekela ovanafikola etete.

Edi oda popiwa komukulunhuwiliki wehongo moshitukulwa shaHangwena Isak Hamatwi eshi a ti etete ota li ende nawa eshi ovanafikola vahapu have li tula mo meetundi shaashi ohava kala va pama pedimo.

Hamawi okwa ti keshe koshikako ombelewa yaye ohai yandje oukutu voufila keefikola di na eendodo okutameka pondodo yotete fiyo onhimuwoyi.

Okwa ti neudo moshikako shotete oikandjolongo aishe moshitukulwa shaHangwena oya pewa oukutu voufila wetete.

Hamatwi okwa yelifa ta ti eesekondofikola iha di mo etete shaashi dimwe odi nanle omakulo okuyandja oikulya kovanafikola ve li momuhandjo.

“Etete ola fimana kounona ve li meendodo dopedu shaashi ota li kwa fele ounona vaha kofe ngeenge ve li meetundi,” Hamatwi ta ti. Okwa weda po ta ti opolongalama yetete otai tu ovanafikola omukumo va kale ve na ohokwe yokufika keetundi efiku keshe.

“Paife ounona ve li meendodo dopedu ihava faula vali keetundi ngaashi kwa li nale konima eshi opolongalama yetete ya totwa po meefikola. Onghee naashi ohashi eta ovanafikola opo va kale tava longo oinyangadalwa yavo nondjungu,” Hamatwi ta ti.

Okwa weda po ta ti eefikola dihapu oda talela eshongo leenhele dokupungula oukutu voufila noshoyo oikwafifo yokutelekela onghee eshi ohashi eta eefikola dimwe opo di longife eembelewa dovakulunhufikola opo di tule mo oukufu voufila shaashi kapena sha onhele.

“Ovadali vamwe ka hole okulihamba okutelekela ovanafikola etete eshi hava kala tava pula okufutwa oshimaliwa. Ovadali vamwe ka hole okuteleka pedu noikuni shaashi vati otava kala va nyike omwifi onghee naashi eshi oshi li eshongo linene la talelwa kefikola dimwe detu mOhangwena,’” Hamatwi.

Okwa kunghilila ovadali opo va twikile nokulihamba okutelekela ovanafikola etete opo opolongalama yetete i kale tai twikile.

fhamalwa@nepc.com.na


2022-07-25  Festus Hamalwa

Share on social media