Omukulunhuwiliki wehongo moshitukulwa shaHangwena Isak Hamatwi ota hokolola ta ti moshitukulwa shaHangwena omwa lopotwa eefikola nhano da monika ombuto yoCovid-19.
Okwa ti eefikola da monika Ofifiya Combined School, Oshaango Combined School, Oshidute Combined School, Epoli Sombined School noWangushu Combined School.
Pefimbo a ninga eenghundafana naKundana Etitatu Hamatwi okwa popya ta ti eefikola nhee onda pata manga molwoombuto yoCovid-19 ya kwata ovanafikola nohovangifikola.
Okwa ti elalakano lokupata eefikola edi opo ku keelelwe etandavelo lombuto kovanafikola novahongifikola aveshe, osho yo ovanhu vomomidingonoko.
Hamatwi okwa ti ofikola Ofifiya Combined School oya monika ombuto ovahongifikola vatano, ashike oidjemo yonavafikola va ningilwa omakonakono inai pwa okukonakona natango.
Ofikola Wangushu oya monika ovanafikola ve li 16 nomuhongifikola umwe, omanga ofikola Oshaango oya kwatwa ovanafikola ve li 13 nomuhongifikola umwe.
Ofikola Oshidute oya kwatwa oya monika ombuto ovanafikola ve li 22 omanga ovahongifikola kape na sha va monika ombuto.
Ofikola Epoli oya monika ombuto ovanafikola ve li 26, omanga ovahongifikola kape na sha va monika ombuto.
Hamatwi okwa denga omufindo ta ti ovanafikola novahongifikola nava ye momwaalu munene opo va ka tunhilwe ombuto yoCovid-19 shaashi osha fimana ngeenge omunhu a tunhilwa.
Okwa yelifa ta ti ngeenge omunhu okwa tunhilwa oha kala e na omhito i li pedu yokukwatwa kombuto shaashi oku li meameno la wana.
Okwa popya ta ti ombelewa yaye oya didilikwa omwaalu wovanafikola novahongifikola vashona va tunhilwa omukifi woCovid-19.
“Ovanhu nava topolafane ouyelele nghee sha fimana ngeenge omunhu a tunhilwa, ovadali navo nava kale tava tu ounona vavo omukumo opo va ka tunhilwe ombuto ei,” Hamatwi ta ti.
Okwa kunghulila ovanafikola opo va twikile nokuliufa komilandu doCovid-19 shaashi omukifi ou owa nyika neenghono.