Ohamba yOvangandjera Johannes Mupiya oya kunghilila oshiwana opo shi kale tashi lopotela ombelewa yaye kombinga yeendingosho hadi kala ovanhu tave li denge, vo tava lundilafana nokutukafana opo di kale da patwa diva.
Okwa ti ombelewa yaye ita ka fiya emanya la londa ku li kwao kombinga yovanhu ve na eendingosho tadi ka lopotwa dina ovanhu tava longo oilonga youxwapindi.
“Ohandi ka pa ta ondingosho keshe tai eta ondundakano moshiwana opo i kale ya ninga oshihopaenenwa sha dikwao,” Mupiya ta ti.
Onghee okwa ti omunhu keshe e na ondingosho na kale a kwashipaleka kutya pondingosho yaye ita longelwa oilonga youxwapindi.
Mupiya okwa yelifa ta ti elalakano lokutula po omulandu ou mu pe opo ku kelelwe oimbuluma tai longwa keendingosho nokukaleka po e landulafano liwa keendingosho.
Edi Mupiya okwe di popya pefimbo a talela po oshikandjo Omuthitu noshikandjo Omundo eshi kwa li a shakeneka oshiwana sha dja komikunda da yooloka mexuliloshivike.
Okwa kumaida oshiwana opo shi kale tashi hoolola oilyowiliki tai kala tai tula po e landulafano keendingosho kombinga yovanhu tava landifa okapana okutala kutya ombelela oya dja peni, okutula po e landulafano leevili dokupalula eendingosho noshoyo okushanga omadina eendingosho odo ita di li ufa komilandu.
“Omunhu keshe ta landifa ombelela ile okapana na kale a shivifila oilyowiliki tete shaashi okwa didilikwa ovanhu vamwe ohava landifa oupana ile eembelela doimuna ya vakwa,” Mupiya ta ti.
Okwa ti eshi otashi kelele oumbudi woimuna noshoyo okuyandja ouyelele ngeenge pomukunda pa vakwa oshimuna.
Okwa kwatwa yoo vali ovadali omukumo opo va kale tava tekulile ounona vavo oukriste nefimano lomufyuululwakalo. Mupiya okwa kumaida ovanyasha opo ve li kaleke kokule nokulongifa oingangamwifi shaashi osha nyika oshiponga ngeenge omunhu a nwa omapangwe.
Okwa weda po ta ti ovakulunhu nava xulife po okukala tava tokelelwa keendingosho nounona vavo shaashi eshi itashi ulike efano lii kokaana kofikola.
“Oshiwana nashi longele kumwe mokukondjifa oimbuluma momudingonoko davo. Oshiwana nashi xulife po oku ya keendingosho pefimbo leevili doilonga,” Mupiya ta ti.
fhamalwa@nepc.com.na