Victoria Kaapanda

Minista gwomidhingoloko, omatalelepo niihwa Pohamba Shifeta okwa undulile oshigongi shina sha nokukandula po uupyakadhi womavi, momukunda Ondando moshikandjohogololo shaNiipa. Pohamba okwali atokola ngaaka Etitatu lyshiwike sha ziko, konima oyendji kwali inaaya holoka. “Omutumba nguka otandi gu undilile komeho sigo esiku ndyoka tali ka tulwa po kelelo lyopamuthigululwakalo noshigwana, taya keli tula po,” ta ti ngaaka.

Ta ti ita vulu okutsikila noshigongi omanga elelo lyopamuthigululwakalo kali po. “Onda tambula ombapila ya shangwa kutya, itali vulu okuthika paife, ihe ote pula kutya oshike inaya tumako omukaleli po,” Pohamba ta pula ngaaka. Ta popi ta ti, moshikando tashi landula, ngele opena ngoka taka kala inaa holoka otaka tsikila noshigongi opo kutokolwe shoka shina okutokolwa noku kandula po omikundu dhili po.

shigongi shoka okwali shina okuningwa sha landula omanyenyeto okuza moshigwana kombinga yevi tali kuthwa pooha nomagumbo momukunda ngoka. Omwedhi gwa zi ko, omukuluntu gwomidhingoloko Timoteus  Mufeti okwali a kaleke onzapo yelelolo lyaNdonga okukutha  evi momukunda moka.

Mufeti okwati, shoka okwali sha ningwa oshoka oompango nomalandulathano ga tulwapo gali ga kondwa. Okukutha evi momukunda Ondado, okwa li kwa kalekwa sigo omasiku 31 gaAguste numvo.

“Omanga omawupyakadhi ngoka inaaga kandulwa po, ehala ndyoka otali tsikile lya pata,” ta popi ngaaka.

Kansela gwoshikandjohogololo shaNiipa Vilho Nuunyango  okwa li kumagidha aashingithi yomavi, ya kale taye ga kutha ko kule nomagumbo. 

‘’Oshikandjohogololo shetu oshina omahala ga mbwalangandja ogendji, ngoka taga vulu oku kuthwa omavi, okuyanda omaupyakadhi gafa ngoka ga holokeke nale, ngaashi oku hanagula omagumbo gaantu,” ta ti ngaaka. 

Nuunyango ta ti, okukutha omavi okweeta omawupyakadhi ogendji, noga pumbwa oku indikwa. “Kandina uupyakadhi no mavi taga kuthwa, oshoka ohage tu kwathele wo  nomavi goku tunga, naa shoka kutya Oniipa opo tayi ende tayi humu ko meho,” ta popi ngaaka. 

“Uupyakadhi wandje owu li ashike paanangeshefa mboka taya kondo oompango nomalandulathano ga yelithwa nawa moonzapo dhawo dhe pitikilo lyoku kutha evi,’’ ta ti ngaaka. Ta ti, okuna okwiidhopa mo momawupyakadhi gantya ngiika, ngaashi ali alopotelwa anuwa  pena yamwe ya li ya hala okukondja omolwa okukutha evi popepi nomagumbo.

Kansela okwa gandja oshiholelwa she kango lyomulonga gwaShigambo, ta ti, ndyoka olyo ehala ewanawa okukuthwa evi, oshoka ota li gandja wo uuwanawa moshigwana, sho omalambo taga kala nomeya ethimbo. “Ta ti, omeya ngoka otaga vulu okukala taga nuwa kiimuna oshowo okulongithwa mooproyeka dhimwe dhuunamapya, nonando osha indikwa manga omolwa omeya gefundja ngoka haga yi sigo omomagumbo,” ta fatulula ngaaka.