kOmpumbu, ngoka taga ka kala ge li 509 methimbo lyomimvo ndatu.
Minista gomayambulepo gwoondoolopa nuushayi Erastus Uutoni okwa ti, Oshakati oshili mondapo okuyambulapo ondoolopa ya sho.
“Omasiku ashike omashona kwa li nda patulula omagumbo gaakalamo yokOnawa oshowo okugandja oopolota, ihe nena natango ongame nguka nda thikama mpaka tandi gandja oopalota mOshakati,” ta popi nenyanyu.
Ta ti, shika otashi ulike eyitulemo nelongelo kumwe lyaaleli yondoolopa yOshakati.
Uutoni ta ti, ota tanga elelo lyondoolopa lyOshakati kutya olyo ndhingi moshilongo ashihe.
“Onda hala omalelo agehe ngoka gasa, ga yuumike, ga longe ngaashi Oshakati tashi longo. Yumukeni, longeni muhumithe komeho oondoolopa dheni,” ta nyenyeta ngaaka.
Ta gwedhapo ta ti, oshilongo shika itashi nyengana okuhumithwa komeho nando, shoka sha pumbiwa elongelo kumwe lyaaleli oshowo aakwashigwana.
Omukuluntu gwehangano lyoBH Properties Ben Hauwanga esiku ndyoka okwa li a fatulula kutya otayaka tunga omagumbo ngoka noshimaliwa she okuza mondjato.
“Omagumbo ngaka otaga ka gandjwa kwaambonga yena iiyemo yo pokati. Ota tu tameke okutunga nena, ihe, kehe esiku etiyali ota tu kala twa mana okuthikameka po etungo,”ta ti ngaaka.
Hauwanga ta ti, Desemba gwomumvo nguka, otaya kala ya thikameka po omagumbo ga thika 100.
Ta ti, omagumbo ngoka otaga kala gena oondando dha yooloka, sha ikolela kuunene we gumbo, ihe kondando yi shi okwiindhindhimikilwa.
“Omagumbo ngoka otaga ka tungwa patatu tango, olweetho lotango otaku tungwa omagumbo 47, olutiyali omagumbo 130 omanga olutitatu omagumbo ge vule 200. Hapo ashike taga huulile mpoka,” ta ti ngaaka. Hauwanga okwati, natango otaka gandja iilonga koshigwana, no taka kuta aanilonga ye vule 600.
Mayola gwondoolopa yaShakati Leonald Hango okwa ti, shoka itashi eta ashike ehumo komeho mondoolopa, ihe otashi eta oompito ndhiilonga.
“Ota tu longo nuundhiginini, nelalakano lyoku gandja omalukalwa koshigwana shetu. momimvo twa taalela, Oshakati otashi ka kala methano lyiilongo yokondje ngaashi Dubai, “ta imemeha.
Hango ta ti, okuna omukumo kutya momimvo dhokomeho, oombashu mOshakati otadhi ka yalulwa nenge mu ka kale kaamuna nando ombashu yimwe.
– vkaapanda@nepc.com.na