Ehangano lyoohi tali ithanwa Okalongo fishing, lya yambindhindha osikola Uahekua Herunga noshimaliwa N$150 000 okutunga ongulu yongundu, oshowo ongulu yokupungulila.
Ehangano ndyoka olya kwashilipaleke okugandja oshimaliwa N$300 000, ayihe kumwe, ihe olyati N$150 000 otaye yi gandja omuvo tagu ya.
Osikola ndyoka oyili ookilometa ooshona okuthika mOtjorutwe moshikandjohogololo shaRuacana.
Omunashipundi mehangano ndyoka lyoohi Jesay Haghuwo okwapopi esiku ndyoka kutya, oya yambindhidha noshimaliwa shoka, onga oshinakugwanithwa shehangano lyawo.
“Oohi odhaaNamibia ayehe, onkene oshasimana uuna uuwanawa wandho, tau topolelwa aantu ayehe,” ta popi ngaaka.
Haghuwo okwakumagidha aalongwa ya sile oshimpwiyu omatungo ngoka, ye gakalekepo opo wo geye ga longithwe natango kooyakwawo, taya zi konima.
“Ehangano olya tokola okuyambindhindha osikola ndyoka, omolwa oompumbwe nonkalo osikola ndyoka yili muyo. Natango olya kwathele okukalekapo ukumwe nohole ndyoka yili po kati kayo, naalongwa ya kale momahala geli wo pala,” ta popi ngaaka. Omukuluntuwiliki mewawa lyosikola ndyoka, oshowo kansela goshikandjohogololo shaKalongo Laurentius Makana Iipinge okwati, okwapandula kiilonga ya longwa kehangano ndyoka lyoohi.
“Ita tu mana okupandula, oshoka shoka shalongwa oshinene noshiwanawa, osha mwenyeke oomwenyo dhetu no tashi eta elunduluko mosikola yetu,” ta popi ngaaka.
Iipinge okwakumagidha omahangano agehe haga pewa iinakugwanitha yokuyambindhidha oosikola, ga gwanithe po omayakulo ngoka ngaashi yeshi nuninwa.
“Onda ndhindhilike omahangano gamwe itaaga gwanithapo omayakulo ngoka, omanga pena oosikola ondhindji dhili moompumbwe,” ta nyenyeta ngaaka.
Ta gwedha po ta ti, shoka otashi kwathele wo natango okutsakaneka epangelo ondjilakati.
Oosikola ondhindji odha taalela omaupyakandhi, ngoka taga vulu okukandulwa po okupitila moomayakulo gomahangano ngoka.
Ta ti, shoka shina oshilongo elongo, aalongwa otaya itulimo meilongo lyawo, uuna yeli momindhingoloko omiwanawa.
Aalongwa posikola okwa li ya holola enyanyu lyawo, taya pandula nokuligola omolwa omatungo taya mono posikola yawo.