New Era Newspaper

New Era Epaper
Icon Collap
...
Home / Ehongo melongifo loshimaliwa na i pule komesho

Ehongo melongifo loshimaliwa na i pule komesho

2023-10-27  Festus Hamalwa

Ehongo melongifo loshimaliwa na i pule komesho

Omuprimaminista Saara Kuugongelwa-Amadhila okwa ti osha fimana ngeenge ovanhu tava pewa eetundi kombinga yelongifo loshimaliwa opo va kale tava ningi omatokolo omondjila nghene oshimaliwa shi na okulongifwa.

Edi Kuugongelwa-Amadhila okwe di popya onghela moWindhoek komutumba wovakainhu wokuyandja ehongo nouyelele kovakainhu noshoyo okutwa ovakainhu omukumo va kale tava kufa ombinga moinyangadalwa yopaliko.

“Ovanhu ova pumbwa okupewa ouyelele nehongo opo ku kelelwe oimaliwa tai longifwa moinima ihe li mondjila, nokuya meengunga inadi pumbiwa. Onghee ovanhu nava twikile okuninga oikonga yokuyandja ouyelele,” ta ti.

Elalakano lomutumba ou okutopolelafana omayele, okuyandja ehongo nokudimbulukifa ovakainhu kutya mboli navo otava dulu okutota po eengeshefa davo nokuvaxwaxwameka okulonga nondjungu.

Omuprimaminista okwa ti ohashi pula oshimaliwa opo eliko loshilongo li hambuke po onghee okwa kumaida ovakainhu navo va kufe ombinga momangeshefelo okuyambula po eliko loshilongo.

“Ohandi kala nda hafa ngeenge ndi wete ovakainhu ve na eenghatu dopombada ile tava wilike moikondo yopombada yomangeshefelo,” ta ti.

Onghee okwa ti eshi otashi ulike kutya moNamibia omu na oufikepamwe notashi xwaxwameke ovakainhu va tumbalekwe moilonga yavo noshoyo okupewa omukumo.

“Epangelo otali twikile okukaleka po onghalo youfikepamwe koikondo ya yooloka mwa kwatelwa oshikondo yopamifyuululwakalo moshilongo,”ta weda po.

Okwa kumaida ovakainhu opo va twikile okukufa ombinga momitumba doludi e li nokukala ve na ekwatafano liwa okupukululafana.

“Oukumwe owa fimana shaashi otau eta oidjemo iwa. Ouyelele owa pumbiwa shaashi otau longo oshiwana,” ta ti.

fhamalwa@nepc.com.na 


2023-10-27  Festus Hamalwa

Share on social media