New Era Newspaper

New Era Epaper
Icon Collap
...
Home / Ehulithe po lyuumasika itali ti oCovid-19 oya hula

Ehulithe po lyuumasika itali ti oCovid-19 oya hula

2022-03-17  Victoria Kaapanda

Ehulithe po lyuumasika itali ti oCovid-19 oya hula

Omupresidente gwoshilongo Hage Geingob okwa kumagidha oshigwana shi tsikile okuzala uumasika momahala gomangundumano uuna sha pumbiwa, oshoka omukithi gwoCovid-19 inagu hula po natango thiluthilu nonando gwa lota.

Presidente ndhoka okwa li e dhi popi esiku kwa li a ningi oshigongi oshi-41, okugandja omalandulathano noompango okukeelela omukithi goCovid-19 kaagu taandele, oshowo okuhulitha po omalandulathano gamwe.

“Uumasika itau dhengele we, konima twa ndhindhilike omukithi ngoka tagu tsikile oku lota. Otwa ndhindhilike aantu taya aluka komukithi ngoka noopelesenta 97 oshowo omaso ge li poopelesenta mbali,” ta fatulula ngaaka.

Ta ti, shoka okwa li ye shi ningi oku eta omalunduluko gamwe oshowo okuhulitha po oompango dhimwe.

Geingob okwa ti, aantu oya pitikwa okugongala piituthi ya yooloka sigo opaantu ye li 1 000, okuza paantu ye li 500.

“Aateleli po ya tuntilwa iikando ayihe ye  yi mana ko, iitaya tutswa we poongamba. Shoka osha li natango sha tokolwa konima omukithi goCovid-19 gwa  ndhindhilikwa gwa shuna pevi moshilongo,” ta ti ngaaka.

Ta gwedha po wo kutya okwalopotwa aantu ya shonopola miipangelo ya kwatwa komukithi ngoka konima yiiwike iishona ya piti.

“Omukithi ngoka natango ogwa shonopala mokutaandela mokati koshigwana okuyeleka noomwedhi dha zi ko,” ta popi ngaaka.

Presidente okwa ti, ota gandja esimaneko enene kaapangi oshowo aaniilonga yuuhaku mboka ya dhana onkandangala onene okulwitha omukithi nguka gu shonopale.

“Sigo oompaka oopelesenta ashike ooshona dhaantu ya tuntilwa okukeelela nokushonopaleka ompito yokukwatwa komukithi gwoCovid-19,” ta fatulula ngaaka.

Ta ti, otuntila oya yambidhidha okushonopaleka omukithi gwoCovid-19 gu taandele shinene moshigwana.

“Ökutuntilwa oko ashike taku mangulula oshigwana, opo kaashi kwatwe nenge okugamena oshigwana kaashi ehame nenge shi hulithe,” ta kumagidha ngaaka.

Geingob okwa ti okutuntilwa natango otaku keelele omikithi dhimwe omipe dhi holoke nenge dhi taandele moshigwana.

“Uumasika natango otau zalwa, nonando itau dhengele oshowo pokati komuntu nomuntu ope na okukala pe na ompito yometa yimwe,” ta popi ngaaka.

Ta kumagidha kutya oshigwana ngele otashi tsikile okugwanitha po oompango adhihe otashi ka sinda omukithi ngoka esiku limwe.


2022-03-17  Victoria Kaapanda

Share on social media