New Era Newspaper

New Era Epaper
Icon Collap
...
Home / Ekondo nelaka lya dhenge ongeshefa yonyama pomutima

Ekondo nelaka lya dhenge ongeshefa yonyama pomutima

2021-02-01  Victoria Kaapanda

Ekondo nelaka lya dhenge ongeshefa yonyama pomutima

Oyendji yomaalandithi yoonyama momapandaanda, mwa kwatelwa aalandithi yuupana oya kanitha iiyemo omolwa omukithi gwekondo nelaka ngoka gwa patitha omalandthilo gonyama.

Gumwe gwomaanangeshefa mboka moshitopolwa shaMusati momudhingoloko gwa Ruacana, Izata Nganga okwa ti epato lyongeshefa ye yonyama olye mudhenga unene  nokumushinitha monima, oshoka omo kwa li  iikolela okuyambidhidha aakwanezimo ye.
“Ondi na omukulukadhi nuunona okuyambidhidha, ihe ongeshefa yandje yokulanditha onyama ndjoka ya pata oya hata ndje pevi,” Nganga a popi ngaaka.

Ta ti , okwa kala ha landitha onyama yoshikombo,  omayi, oondjuhwa iikwamboga oshowo okukosha oohauto.
Nganga ta popi neyeme ta ti, oongeshefa adhihe dhoka odha pata. 
“Ayihe mbyoka oya pata oshoka  ka pena ookasitoma. Ookasitoma okwa li hadhi hilwa konyama, sho taya li, yo taya koshitha oohauto dhawo. Yamwe mboka taya landa onyama,  yo taya pitula iikwamboga ya wo. 

Omulandithi gwokapana, okwa gwedha po kutya mongeshefa yokulanditha onyama okwa kala mo oomvula dha pita pundatu, ihe ongeshefa oya kala tayi ende nawa lela.

“Ondi inikela kutya uupyakadhi mbuka hangaye ashike wa guma, ihe oshilongo ashihe. Ota tu indile pamwe epangelo ota li vulu okuya po nomukalo gumwe, opo tu vule okutsikila okulanditha, oshoka ota tu mono iihuna.
Silas Newaka ngoka a ningi oomvula hetatu ta landitha onyama mOshakati okwa ti, aalandithi yoonyama oya kala ye li muupyakadhi oku za omvula ya zi ko, omolwa omukithi gwocorona, ihe natango omaupyakadhi otaga tsikile.

“Omvo gwayi aguhe inatulongo oshoka oongeshefa odha li  dhapata, nuumvo natango oongeshefa dhoku landitha oonyama odhapata. Oshi li atu mono iihunua,” Newaka ta popi ngaaka.
Newaka ta ti, oku li muupyakadhi wu vule uunene, oshoka okuna aanona taya yi koosikola oshowo kiiputidhilo yopombanda ihe ke na oshimaliwa sho kuya pa oshoka omalandithilo oga pata.

“Oshimaliwa otashi zi peni? Kandi na we sho tandi vulu okunyangadhala nasho ngele kakushi okulanditha onyama. Mboka owo ashike uunongo nda pewa,” Newaka ta popi.

Ta gwedhapo ta ti, epangelo ngele itali vulu okuyapa epitikilo lyoku patulula ongeshefa dhawo, ya tsikile okulonga, na li ya yambidhidhe nando onoshimaliwa sho komwedhi, oshoka otaya si ondajala.
Newaka ta ti, oha landitha onyama yongombe, ndjoka hayi pu po konima yomasiku gaali nenge gatatu.
Okwa li handi landitha N$ 3 000 mesiku, ihe paife kapena we sha. 


2021-02-01  Victoria Kaapanda

Share on social media