“Ohandi pandula Kalunga eshi a kala pamwe naame okudja mefiku lotete nda tameka okuvela omukifi woCovid-19. Kakwa li ndi shi ngeenge ohandi xupa shaashi onda kala handi vele ndi li monghalo idjuu. Onda ninga efimbo lile moshipangelo ndi li komashina okufudifa.”
Aa omatumbulo aEva Elago weedula 51, ta hokolola nghee a kala moshipangelo shaNdangwa shopaumwene ta vele ombuto yoCovid-19.
Pefimbo Kundana a talela po Elago moshipangelo shaNdangwa shopaumwene Etitatu, mefiku olo kwa li ta lekelwa okwa popya ta ti okwa kala tavele ombuto yoCovid-19 oule weemwedi mbali nomafiku atatu.
Okwa ti moshipangelo okwe ya mo momafiku 19 Juli konima eshi a monika ombuto, omo a kala e li monghalo idjuu ita dulu okufuda nokupopya.
“Pefimbo eshi nda didilika kutya ondivna omadidiliko ombuto yoCovid-19 onda ya kundokotola wange wopaumwene kOndangwa, nokonima yomakonaakono okwa lombwela nge kutya ondi na ombuto. Onda kala ndi na oumbada kutya pamwe ohandi fi, onghee omushamane wange okwa twala nge koshipangelo shopaumwene shaNdangwa opo ndi kale ndi li mefiloshisho lovanailonga vouhaku,” Elago ta ti.
Okwa popya ta ti okwa kala e na omukumo neitavelo kutya ota veluka nonande a kale ta hepekwa komadilaadilo kutya pamwe ota fi ngaashi ovanhu vakwao va fya kombuto ei.
“Ombuto yoCovid-19 omukifi woshili, onda kala ashike ndi li komashina shaashi ihandi dulu okufuda kwaame mwene. Omafimbo amwe ihandi dulu nokulya shaashi onda kala ndi na omutima tau vele neenghono,” Elago ta ti.
Elago oku li omunailonga kelelo lodoolopa yaHelao Nafidi, ha longo onga omukulunhu koshikondo shoiniwe.
Okwa ti ota pandula Kalunga eshi e mu velula kombuto yoCovid-19 nokukala e na eenghono, neitavelo kutya ota veluka.
“Ohandi pandula ovanailonga pamwe naame, ofamili yange aishe, ookahewa kange nosho tuu ovanhu aveshe eshi va kala pamwe naame pefimbo lidjuu eshi nda kala handi vele ombuto ei,” Elago ta ti.
Okwa ti ota pandula yoo vali ovanailonga aveshe vomoshipangelo shopaumwene shaNdangwa eshi va kala noku mu fila oshisho okudja mefiku lotete a kwatelwa meembete fiyo ta lekelwa.
“Ovanhu nava kale ve na omukumo neitavelo ngeenge tava vele shaashi kalunga oku na eenghono, kaku na shimwe Kalunga ita dulu okuninga. Otwa pumbwa okukala hatu indile tuhe na edimbuko ngeenge tu li mouwehame,” Elago ta ti.
Elago okwa popya ta ti ovanhu nava kale tave liufa komilandu doCovid-19 edi ta tulwa po efimbo keshe shaashi omukifi ou owa nyika oshiponga neenghono.
“Natu djaleni oumaska vokomilungu efimbo keshe, natu kale hatu likosho keenyala opo tu keelele etandavelo lombuto ei mokati ketu,” Elago ta ti.
Elago pefimbo eshi e li moshipangelo okwa kanifa ovakwapata vaye vavali va fya kombuto yoCovid-19, ashike ina teka omukumo nande okwa kala ashike ta ilikana kuKalunga opo e mu pe oukolele.
Okwa weda po ta ti kakwa li shipu okukundaneka ovakwapata vaye va fya kombuto ei.
Mopaife Elago okwa lekelwa moshipangelo Etitatu konima eshi oidjemo yaye tai ulike kutya ke na sha vali ombuto, onghee okwa ya keumbo laye komukunda Oshitutuma, moshitukulwa shaShikoto.
Nonande a lekelwa moshipangelo, ota ka kala ta longifa eshina loku mu kwafela okufuda keumbo fiyo ta shuna konghalo ngaashi kwa li e li shaashi natango ina veluka filufilu nonande ta ulike kutya ke na sha ombuto yoCovid-19.
“Natu kaleni tu na elineekelo muKalunga ngeenge tu li moudjuu shaashi oye ashike omuxupifi wetu,” Elago ta ti.