Mayola gondoolopa yaShakati Leonard Hango okwa ti elelo londoolopa yawo itali ka tula manga miilonga oshinima shokuteta ko omeya gaakalimo ngaashi sha pitithwa oshiwike sha zi ko.

Ta ti, shoka itashi shiwa oshoka elelo olya li lya pititha opologalama yoku dhima po oondjo ndhaamboka kwa li ye na uunyengwi okufuta oongungu dhawo dhomeya.

“Mongashiingeyi ondu uka koshigongi hoka tatu ka kundathana, opo ndi vule okugandja uyelele awuhe wa pumbiwa,” ta popi ngaaka.

Pethimbo epangelo lya li lya eta po omulandu kutya aantu inaya patelwa we omeya molwa ekukeelela lyetaandelo lyomukithi gwoCovid-19, oyendji oya li ya ya moondjo oshoka ka kwali we haya futu omeya gawo. 

Iiwike iyali ya piti elelo lyondooopa lyOshakati olya li lya pititha omushangwa kutya otali tameke okuteta ko omeya gakalimo yena oongunga andola oku tameka ohela.

Shoka okwa li sha halutha aakalimo nokugandja omanyenyeto gawo omolwa ya li ya lombwelwa kutya oongunga ndhawo otandhi ndhimwapo.

Selma Kambonde okwa ti, shoka otashi eta uupyakandhi pokati kelelo lyondoolopa naakalimo.

“Nani oya kala tayetu fundju, ihe nani hasho taya longo? Ita tu patelwa omeya, ondjo ndhetu oya ti odha dhimapo,” ta ti ngaaka.

Sirka Johannes okwa ti, oyaningi ngaashi ya li ya kumagidhwa kelelo opo ya ndhiminwepo oongunga dhawo, ihe ngele oya teteko omeya gaakalimo otaya eta iita. 

“Oshike yena okutu lombwela iinima itaaye yi ningi, shoka kashili mondjila, inaya kala we taya panditha aaleshi naapulakeni,” ta nyenyeta ngaaka.

Taya ti, shoka ya popile oyena uumbangi musho, onkene naya lundulule ondungethaneko ndjoka.

-vkaapanda@nepc.com.na

Caption:Omeya gaakalimo ye li moondjo mOshakati itaga tameke okutetwa ko nena

Efano otali ulike ashike