New Era Newspaper

New Era Epaper
Icon Collap
...
Home / Endiki lounona ve na okaanghela la yambididwa

Endiki lounona ve na okaanghela la yambididwa

2023-11-02  Festus Hamalwa

Endiki lounona ve na okaanghela la yambididwa

Ohaputeka yoGeka oya yambidida noshimaliwa shoN$120 000 endiki loChica Interim Home, oko haku di ounona ve na omukifi wokaanghela.

Oshimaliwa osha yandjwa Etivali nelalakano lokulanda oipumbiwa younona.

Chica Interim Home endiki haku kala ounona ve li kepango lokaanghela nohava kala ve li mefiloshisho lovadali vavo oule woivike ihamano

Endiki eli ola totwa po kehangano loCancer Association of Namibia nelalakano lokuyambidida ounona ve na okaanghela. Moshipopiwa shaye omukulunhuwiliki wohaputeka Geka, Nardia Coetzee okwa ti endiki ola taalela omashongo mahapu unene tuu oshimaliwa shokulanda oipumbiwa younona.

“Ounona ava ohava pumbwa yoo vali omayakulo exungomwenyo unene tuu ovo ve li peedula 10 fiyo 18. Ovadali vavo navo ohava pumbwa exungomwenyo molwaashi ohave lipula ounona vavo,” ta ti.

Okwa yelifa Chica Interim Home okwa ninga eumbo lokuyandja omukumo kounona tashi pitile mokuyambididwa.

Okwa ti she likwatelela kongongahangano youndjolowele mounyuni omudo keshe omivalu 400 000 dounona hava lopotwa va ningilwa omakonakono okaanghela okutameka podula imwe fiyo nhee ohava xulifa komukifi oo.

Coetzee okwa weda po ta ti omudo keshe moNamibia ounona 250 ohava ningilwa omakonakono okaanghela.

fhamalwa@nepc.com.na 


2023-11-02  Festus Hamalwa

Share on social media