Ovakalimo vomoshitukulwa shaHangwena noshoyo oshiwana hashi di poushiindalongo Angola hashi mono omayakulo koshipangelo shaNgela itava ka kala vali momikweyo diledile va teelela okupewa omayakulo opaunamiti keendotola molwashi paife oshipangelo shaNgela osha pewa eendokotola 14.
Oshipangelo shaEenhana osha pewa eendokotola 11 omanga oshipangelo shaKongo sha pewa eendokotola nhee.
Okwa didilikwa oipangelo yomOhangwena ya kala i li momhumbwe yeendokotola nomolwa onghalo oyo, oshiwana oha shi kala momikweyo dile-dile.
Oshipangela shaNgela osho shimwe sha didilikwa ha shi kala shi na omuvalu muhapu wovanhu, ashike ovahakuli unene eendokotola inadi wana. Oshinima osho ohashi etifa opo ovanhu vamwe va shune komaumbo inava yakulwa.
Edi oda kolekwa komulunhuwiliki wohauku moshitukulwa shaHangwena John Hango. Hango okwa ti omukundu wokuhe na eendokotola da wana mOhangwena owa kandulwa po paife onghee oshiwana otashi ka kala sha mona omayakulo opaunamiti pefimbo.
“Otwa kala tu li modjuu eshi tuna ovanaudu vetu hava ende endjiladiledile tava ka konga omayakulo ouhaku ashike ohava shuna komaumbo ina pangwa molwashi pehe na eendokotola,” Hango ta ti.
Okwa ti naashi osha eta ombelewa yaye opo i kale ya pula ouministeli wouhaku u tumine eendokotola mOhangwena shaashi oshiwana osha kala tashi nyenyeta unene.
Okwa yelifa ta ti epangelo ota li lalakanene ovanhu aveshe va kale va mona omayakulo opaunamiti pefimbo shaashi osha fimana ngeenge omunhu ta pangwa pefimbo opo a kale a veluka diva.
Hango okwa weda po ta ti unene tuu oshipangelo shaNgela osho shimwe hashi ya kula ovakwashiwana vahapu vaAngola hava ka konga omayakulo opaunamiti ashike vahapu ka kwa li hava pangwa pefimbo shaashi ova kala ve li momwaalu muhapu va teelela oku ya kulwa kondokotola umwe.
Hango okwa kumaida ovapangi neendokoto opo di kale tadi yakula nawa oshiwana noshoyo okukala tadi nyamukula oshiwana nawa ngeenge tashi pula ouyelele.
“Ovanhu nava kale tava kufa ko omadina ovapangi ile eendokotola ngeenge omunhu ina yakulwa nawa ile va lopotele ombelewa yange,” Hango ta ti.