New Era Newspaper

New Era Epaper
Icon Collap
...
Home / MET otaka futa omunafalama liila oimuna koifitukuti

MET otaka futa omunafalama liila oimuna koifitukuti

2021-07-22  Festus Hamalwa

MET otaka futa omunafalama liila oimuna koifitukuti

Ouministeli womidingonoko nomatalelipo owa longekida oshimaliwa sho N$40 000 tashi ka futa omunafalama koshitukulwa shaKunene e na oimuna yaye i li 76 ya dipawa keenghoshi.

Omafiku a pita okwa lopotwa eenghoshi da ningila oushada oimuna yomunafalama vokoLeeukop popepi noGrootberg moshitukulwa shaKunene, omo oikombo i li 66, needi dil 10 da dipawa keenghoshi. 

Eenghoshi edi vati okwa li de li vaka koshikunino shoinamwenyo, ashike ouministeli owa dopa oku londwela oshiwana pefimbo.

Meenghundafana a ninga naKundana omupopiliko wouministeli womidingonoko Remeo Muyunda okwa hokolola ta ti ouministeli owa didilika oshiningwanima eshi shomunafalama ou a ka nifa oimuna yaye ihapu unene, onghee okwa ti owa kufa etokola opo omunafalama ou a kale a futwa oN$40 000 konima eshi a kanifa oshuunda yoimuna yaye aishe.

Muyunda okwa popya ta ti ouministeli wavo ouna oshisho noshiwana notau kwashipaleke kutya otau ka futa omunhu keshe ou ta ka longelwa oushada koifitukuti. Onghee okwa ti oshiwana nashi kale tashi lopotele eembelewa davo meni leevili dili 24 ngeenge sha longelwa ominyonena koifitukuti ei.

Okwa yelifa ta ti ope na omakonakono onhumba a ningwa opo ku talike kutya ngeenge omunafalama a ningilwa ominyonena koifitukuti ota dulu tuu oku futwa.

“Oshimaliwa eshi ha tu yandje kovanafalama ngeenge va longelwa oushada koifitukuti oha shi yandjwa shili pongushu yoinima ei omunhu a ka nifa, onghee tete ohapa ningwa omakonakono kutya omunhu okwa ka nifa oinima ifike peni,” Muyunda ta ti.

Okwa popya ta ti ouministeli wavo owa tula eepolongalama doku kelela oifitukuti iha ndje mo moyuunda unene keenhele edi da ninga oihakanwa ngaashi oshitukulwa shaKunene, Kavango nErongo

“Mopaife ngaha oministeli yomidingonoko oya ninga oyunda i li 25 oku dja ketameko lomudo ou, onghee natango otwa tula moilonga opo tu kale twa ninga oinyongo i li 100 opo tu kwashipaleke kutya eenghoshi oda patelwa mo moyunda, neameno loimuna yovakwashiwana opo lili,” Muyunda ta ti.

Okwa twa oshiwana omukumo opo shi kale sheli neekela ouministeli womidingonoko shaashi ou na oshisho nelalakano loku amena oimuna.


2021-07-22  Festus Hamalwa

Share on social media