Epandaanda lyongeleka kwa li tali longwa, sho tali tulwa opate yoteya okuza 2021 olya pu okulongwa nuumvo muJuni, nokwa li lya patululwa pambelewa mehuliloshiwike lya zi ko.
Mayola gondoolopa yaNgwediva Taarah Shalyefu okwa ti epandaanda ndyoka lya za koAbraham Nyambali sigo okepandaanda lyaKahumba kaNdola okwa li lya longwa koshimliwa shi thike poomilliona N$8.2.
“’Epandaanda ndyoka otali ka kwathela aalongithi yiihauto oyendji, unene aakalimo yokoExtention 6, 7, ongeleka yoGloria Dei oshowo ongeleka yoRoman Catholic,” ta ti ngaaka.
Mayola ta ti, elelo lyondoolopa okwali lya longo ondjla ndjoka onga oshitopolwa shiinakugwanithwa yelelo okulongela aakalimo uuwanawa oshowo okugwanitha po oompumbwe dhawo.
“Elalakano okukala noondjila dha kwatathana sigo okomahala ngoka haga gandja omayakulo ga pumbiwa kaakalimo yomondoolopa yaNgwediva,” ta ti ngaaka.
Ta ti, elelo lyondoolopa otali tsikile okulongela aakalimo yawo uuwanawa oshowo okuhumitha komeho ondoolopa yawo komeho pamikalo adhihe.
Ta gwedha po ta ti, ondjila ndjoka okwa li ya patululwa ashike konima yethimbo eshona sho ondjila ndjoka ya za kosikola yaMweshipandeka yu uka komahooli taga ithanwa Select kwa li ya tulwa oteya.
“Epandaanda ndyoka olyi na uule wookilometa 1,6, lyedhina tali ithanwa Ehenge. Elelo lyondoolopa natango okwa li lya longo oombululu dhokupita omeya mooha dhoopate koExtention 10 oshowo koReception 2, koshimaliwa shi thike poomiliona N$2.5,” ta ti ngaaka.
Mayola okwa fatulula kutya oopoloyeka ndhoka okwa li dha longwa omolwuupyakandhi womeya ngoka haga kala ga talama komahala ngoka a tumbula.
Ta ti, oopoloyeka ndhoopaipi dhokuenda onyata koSky oshowo Extension 12 oyi li pokupwa.
Mayola okwa kumagidha omahangano haga pewa ootendela dhokulonga iilonga mbyoka dhi kale hadhi longo tadhi endelele opo dhi mane pethimbo ndyoka ya pewa.
Moses Hamutumwa ngoka kwa li a popi peha lyaakalimo yokoExtention 6 oshowo 7 okwa li a pandula elelo lyondoolopa lyaNgwediva sho lya yamukula omakemo goshigwana.
“Ngaashi sha tseyika nawa kutya Ongwediva oyi li komeho mehumokeho, elelo lyondoolopa olya pumbwa okukala tali pulakane nokuyamukula komakemo goshigwana,” ta ti ngaaka.
vkaapanda@nepc.com.na