Victoria Kaapanda

Sesilia Iikango, 39, ngoka a ningi oomvula 10 e li megumbo, konima a kwatwa kuunkundi wontulo, okwa ti, epangelo olye mu idhimbika, nonando shoka a longele oshilongo  shika oshi na ondjokonona yaaluhe.

Iikango okwa tameke eyithano lye lyokutondoka omanga e na oomvula 14, ethimbo ha yi kosikola.

Omutondoki nale, okwa yambukile momukunda Onkani moshitopolwa shaMusati. “Onda longo nuudhiginini okutula epandela lyaNamibia pombanda okuza mo 1995, ihe nena Uuministeli womawudhano owa ekelahi ndje, sho nda kwatwa kuunkundi wontulo tayi pi,” Iikango ta ti ngaaka. Ta hokolola ta ti, uuwehame mbuka owa tameke konima a li a ka tondoka koGermany mo2001. “Ndohotola okwa li a indike ndje okutondoka, nonando inashi za kehalo lyandje.  Shoka inandi vula oku shi tinda, oshoka onda hala okukwatela po uukolele wandje,” ta ti ngaaka. Iikango ta ti, nonando aawiliki ye, kakwa li ya itaala shoka ta popi kutya okwa indikwa okutsikila okukutha ombinga momadhano gokutondoka, okwa li e ya ulikile oombapila adhihe dha zi kundohotola. “Uuministeli womawudhano onda kala ethimbo nuule oku wu ningila omayindilo giilonga iikando oyindji, nonando petameko okwa li yu uvanekele ndje kutya, otaya tala iilonga mbyoka taya monene ndje, oomvula 10 paife, inaaya yamukula ndje,” ta hokolola.

Iikango okwa ti, ethimbo ndyoka e li pevi okwa kala ta kambadhala nokutsika eyilongo lye, sigo amono onzapo yo Diploma yuuhongi. “Otandi lili nda tala koshipala shawo oshoka onkalamwenyo yandje okwa li, nde yi tula moshikumungu shomawudhano, ihe ya ningwa ohupi kuunkundi,” ta popi nomahodhi taga tondoka. Ta pula ta ti, omolwashike itaa vulu okukwathelwa, ngele aanamawudhano aakwawo yamwe, oya kwathelwa okupewa iilonga kepangelo, omanga ta mono iihuna.

Iikango okwa ti, oye omutondoki gwotango a sindana ombandi yosiliveli mo 1998 koRussia. Ta ti omumvo ogo tuu ngoka, okwa li a sindana omutondoki dhingi moNamibia.

“Onda li nda tsikile oku utha ombinga mokutondoka, nonda kala handi sindana olwindji omakopi noombandi moshilongo ashihe,” ta ti ngaaka. Ta ti, onkalo otayi ende tayi yaga kesipa, noshimaliwa shoku ka konga iilonga kashi po.

Iikango ta ti, oya valwa 11 kuyina, ihe ayehe ohaya hupile mopenzela yomukulupe. Omukuluntu  mendiki lyomawudhano Sivute Katamba, okwa koleke kutya Iikonga, okwa dhengela mombelelwa ye iikando oyindji, ihe okwa kala nokumuyamukula kutya, ngele opwe ya ompito yiilonga, otemu tseyithile.

“Oku gandja iilonga okuna oonkatu hadhi landulwa, ihe ihayi gandjwa ashike ngaaka. Ota popi nawa kutya oku na onzapo yuuhongi, oshike itaa kongo iilonga,” Katamba ta pula.

“Aanyasha naya tameke okunyangadhala yoyene, pehala lyokutegelela aluhe epangelo lyiyape iilonga. Ngaashingeyi mUuministeli wetu, kamu na oompito dhiilonga,” ta ti ngaaka.

Ta gwedha po ta ti, nonando ongaaka kapena omulandu tagu ti, omuntu ngele okwa li hakutha ombinga momawudhano, na pewe iilonga kepangelo.