Aayelele moshikandjohogololo ShUuvudhiya momudhingoloko gwOkaukuejo, oya gandja omanyenyeto gawo kutya oya hala omauwanawa agehe ya li ye na, omanga oshilongo inaashi manguluka.
Omupopiliko gwakaalimo yomOkaukuejo Abel Bandu Komob okwa ti, oya kuthwa omauwanawa ogendji, ihe kakwa li ye shi tseyithilwa nenge ye shi kundathana naanambelewa yepangelo.

“Okwa li hatu dhipagelwa iiyamakuti, hatu pewa onyama kepangelo oshoka omuhoko gwetu ogwa kala hagu hupile miiyamakuti, ano muukongo, ihe nena oonkondo dhoka otwe dhi kuthwa kepangelo,” Komob  a popi ngaaka.
Ta ti, oyendji taya kwatwa momudhingoloko gokombinga ndjoka yEtosha, aantu yomihoko dhawo, oshoka oyendji ihaya longo yo kaye na mpoka taya hupile.

Komob  ta ti, shoka ohashi thiminike aakwashigwana ya ka konge uuhupilo wa wo.  “Epangelo nali galule omauwanawa ngoka, ngaashi okutopolelwa onyama, nando lumwe momwedhi, se katu shi oyendji nokumana po iiyamakuti,”  Komob ta popi, omanga yakwawo taya hakele omake yo taya zimine kutya ota popi oshili.
Okwa gwedha po ta ti, epangelo olyi shishi lela kutya omuhoko gwawo inagu mana osikola, oyendji inaya longwa, yo kaye na iilonga.

Ta ti, ngaashi iilonga yOmEtosha, kape na ngu e ya vule oku yi longa.
“Iilonga mbyoka okwa li tu na okukala twe yi pewa tango, ihe epangelo olya kuta ashike aantu ya za ko kule, kondje yEtosha shoka otashi ti ngiini? Ta pula.

Komob ta ti, epangelo olya indika ya londe moohauto dhepangelo. Ta ti, okwa li haya faalelwa koondolopa oshali ihe paife moohauto ohaya fukwa mo. “Otu na uunona momagumbo, tse otu li natango  momagumbo gaakuluntu yetu. Otwa hala omahala tu tunge omalukalwa getu muka mEtosha. Tse itatu pitike okutembudhwa nando, mpaka opo twa valelwa, ihe katu na esiku tu ze po,” Komob  a popi ngaaka.
Ta ti, epangelo nali ya pe omahala mpoka taya vulu okutunga omagumbo gawo, oshoka yo itaya itaala okutembudhwa.