Epangelo onkene tali tsikile okukondolola oshowo okukandula po onkalo yondjala moshilongo, ndjoka kwa li unene ya dhigupala okuza momumvo 2012/13.
Ndhoka odha popiwa komupeviminista guunamapya omeya nomavi Anna Shiweda, esiku kwa li ya dhimbulukwa esiku lyiikulya muuyuni. Esiku ndyoka okwa li lya dhimbulukwa kohi yoshipalanyolo “Etokolo lyetu olyo onakuyiwa yetu, iizemo yi li hwepo, uundjolowele wuli hwepo, omundhingoloko guli hwepo oshowo onkalamwenyo yi li hwepo”mOmbaye moshitopolwa shErongo.
“Aantu ye vule 859 000 oya ndhindhilikwa kaayena uupyakandhi wondjala, naantu ye vule 330 000 ya taalela ondjala omanga ye vule 859 000 ya taalela ondjala yi li hwepo,” ta popi ngaaka.
Omwaalu ogundji gwaantu ya taalela ondjala ya yaga kesipa, ogwa lopotwa unene kiitopolwa yokuuninginino-nooli, hoka kwali kwa ndhengwa unene kondjala omimvo dhayi.
Tagwedhapo ta ti, oopelecenta 70 dhaaNamibia odha ikolelela mokuhupila muunapya.
“Omvo nguka otwa ndhimbulukwa esiku lyiikulya tuli kohi yo mukithi omundhigu gwoCovid-19, ngoka gwali gwa shunitha eliko lyoshilongo pevi oshowo muuyuni awihe,” ta ti ngaaka. Minista okwati, omukithi ngoka natango okwali natango gwa eta uupyakandhi kombinga yuunamapya, unene kombinga yoshimaliwa.
Omukwatelikomeho mehangano lyoFood and Agricutulture Organization (FAO) moNamibia Farayi Zimudzi okwati, oopelecenta dhaaNamibia dhili 81, odha ikolelela koombinga dhimwe dhomapya gawo.
“Elalakano okukwashilipaleka kutya aantu ayehe kehe moshilongo ohaya li iikulya yina uundjolowele oshowo tayi tungu omalutu gawo, okukeelela omauvu taga vulu okuetwa kondjala,” ta ti ngaaka.
Ta kumagidha oshigwana shoka itaashi vulu okulanda iikulya yina undjolowele, opo ya itulemo mokulonga noonyala dhawo, ya etepo iikulya yina uundjolowele.
Ngoloneya gwoshitopowa shErongo , Neville Andre okwati, nonando onkalo yoku keelela omikithi tadhi etwa kondjala ya kala noku kondololwa nawa, natango oshinakugwanithwa shepangelo okukwashilipaleka kutya onkalo ndyoka itayi holoka moshilongo.
“Omaupyakandhi haga etitha onkalo ndyoka unene, oluhepo oshowo okwaana iiyemo ya sha,” ta fatulula ngaaka.
Ta popi ta ti, omaupyakandhi gamwe geli kuushayi ohaga etwa ko kwaana omeya, shoka hashi etitha eso lyiimuna oshowo ehanagulepo lyiilonga yomompya.
Ta ti, oya kala yataalela uupyakandhi moshitopolwa shawo, sho iikandjohogololo Daures oshowo Utuseb ya kala ya taalela ondjala uule womimvo heyali.
– vkaapanda@nepc.com.na