New Era Newspaper

New Era Epaper
Icon Collap
...
Home / Etemo lya ya momupini… Iilonga yomomapya oyi li metifa

Etemo lya ya momupini… Iilonga yomomapya oyi li metifa

2022-02-14  Victoria Kaapanda

Etemo lya ya momupini… Iilonga yomomapya oyi li metifa

Aanamapya mboka ya li ya pulula omapya gawo pehulilo lyomvula oshowo petameko lyomumvo oye li metifa okulonga omapya gawo.

Oyendji okwa li yi ihakana omvula yotango, noya ningi aanelago sho iilya yawo ya li ya mono omuloka mbala.

Oshiwike sha zi ko omvula oya loko nawa unene moshitopolwa shaHangwena nookombinga dhimwe dhiitopolwa yomonooli.

Shoka osha li sha nyanyudha aanafalama oyendji, noku ya pa omukumo kutya nuumvo otaya ka likola mo sha momapya gawo, nonando ya li ye li pokusholola.

Simon Shipanga gwomomukunda Ongha yaNanghonda okwa ti omumvo nguka kakwa li gwa piti ko nawa, omvula okwa li ya kwata ethimbo kashona okuloka, nokwa li ye li pokusholola.

“Nani sho haku ti, omvula ndjoka hayi kala ko ohayi ka loka nawa oshoshili. Shoka onde shi mono, omvula oya loka nawa okutameka iiwike iyali ya piti,” ta hokolola ngaaka.

Ta ti, oku na omukumo kutya nuumvo otashi ke ya endela nawa, ondjala otaye yi thangele kokule, nuumvo oku na ekuta.

“Shoka sha pumbiwa okulonga nuudhiginini, opo tu ka teye shoka twa kuna. Omagalikano otatu ga ukitha ashike kuPamba opo omvula kaayi loke sha pitilila, lyo efundja lyi ye lyi hanagulepo omapya getu,” Shipanga ta ti ngaaka.

Omukulupe Saima Petrus ngoka a li a adhika ta nu omboga, momukunda Omafo okwa ti, omwenyo gwe ogwa talalelwa nawa.

“Omboga ondjika tandi nu ndi ka tulepo ndi lye omanga iilya yandje ya mena nawa, ndu uvite ombili shili,” ta popi ngaaka

Ta ti, omvula ohayi ya kutha momitumba.

“Tala omvula sho ye tu ningila, aanona nayo oya za mo megumbo ya ka kwata omafuma, omanga tate a kalela oongombe dhe u uvite nawa sho tadhi li omwiidhi,” ta popi
ngaaka. Petrus okwa ti, okwa fatulula ta ti, omvula oshinima oshinene nosha simana, unene kuyo mboka ye li kuushayi, kehe shimwe ohashi yambidhidhwa okuya komeho uuna omvula ya loko nawa.

Omvula oya loko nawa oshiwike sha zi ko miitopolwa ngaashi Oshana oshowo Oshikoto.

Aakalimo yomoshitopolwa shaMusati oya ti oya mona ngaa omata ihe hago gokupandulitha.

- vkaapanda@nepc.com.na


2022-02-14  Victoria Kaapanda

Share on social media