New Era Newspaper

Icon Collap
...
Home / Geingob: Mulilo wamagesi ukatisa zende mwaImpalila

Geingob: Mulilo wamagesi ukatisa zende mwaImpalila

2021-11-29  Aron Mushaukwa

Geingob: Mulilo wamagesi ukatisa zende mwaImpalila
Top of a Page

IMPALILA - Kalilimo zeñata bayahi baImpalila nebatalimani ni butata bobuñata, sina libaka zeñwi mwasikiliti sa Zambezi ni naha kabupala. Hala butata boo neli kutokwa mulilo wamagesi. Bane bakwanisa bakala kusebelisa mulilo walizazi (solar), mi bane basa ipumaneli neba sebelisa likota kuapeha lico. Kono zeo seikaba matangu kasamulaho wakukwalulwa simubuso wamulilo wamagesi mwaImpalila kiMueteleli wanaha Hage Heingob viki yefelile. Purojekiti yamasheleñi alikana bolule bamashumi amabeli kababalalu (N$23 million) inungahanyize lilalo zaMbalasinte, Kasika ni Impalila. Mueteleli nasusuelize baeteleli basikiliti, silao ni manduna baImpalila kwamunwana waupa wasikiliti kubabalela zwelopili yebatiselizwe katundamo.

Kuyahiwa kwamundandwe ofita mwahalimu walibima zemashumi asilelezi, ili one ukalezi faIvilivinzi kuya Impalila kunungahanya Mbalasinte ni Kasika utisize kuli bayahi basike bakungulelwa kwatuko. “Kutisa mulilo wamagesi kwasibaka se, kukatisa zwelopili kwasicaba. Sicaba sa Impalila ni minzi yeli bukaufi bakakona kuekeza kwanako yalihola zebanga mwalitaba zalipisinisi,” nekubulezi Geingob. “Kutisa mulilo wamagesi mwasilalo se kukahulisa litaba zalipisinisi ni kunanula kalulo yabupoti yene fofalizwe kibutuku bwa Covid-19. Kamaniti ukatisa zende zeñata,” naekelize. 

Nabulezi hape kuli mubuso uitamile kualabela kwa litokwahalo zasicaba mwanaha kaufela, mwanako yekuswani kuisa kuyetelele. “Kuisa mulilo wamagesi mwalikiliti kaufela kukabapala kalulo yetuna kuli milelo yetomilwe ipetahale mwanaha.” Nabulezi hape kuli kuisa mulilo wamagesi mwalibaka zamatakanyani kimulelo wamuuso wakubata kumbweshafaza mayemo asicaba. Zeo halili cwalo muzamaisi wakampani yaNampower Kahenge Haulofu naize purojekiti yene kalile mwakweli ya Muimunene 2019, neswanela kufela Ñulule 2020.

 Kono bakeñisa butata bwa muunda ni Covid-19, nefelile feela mwakweli ya Muimunene unumwaha. “Sikwata sene sietelezi purojekiti nesina nikutalima sinca milelo yapurojekiti hane izwelapili, kakuli neba mangana ni mayemo alibaka zeo,” natolokile. Hana bulela kuyemela sicaba Ngambela waMasubia Albius Kamwi naize mulilo wamagesi uamuhelwa kamazoho amabeli, kakuli ukatisa zwelopili yetokwiwa kisicaba. Impalila ipotolohilwe kinuka yaZambezi kwamutulo ni nuka yaChobe kwambowela, mi kufumaneha batu babalikana 2 500 kuisa kuba 3 000.


2021-11-29  Aron Mushaukwa

Share on social media
Bottom of a page