Ondina omukumo no ndinekelela kutya Namibia ota vulu okugalula ehumokeho lyeliko lyoshilongo. Ndhoka odha popiwa komuPresidente gwoshilongo Hage Geingob ohela sho a li a patulula egumbo lyopashigwana pambelewa.
“Nonando oshilongo sha kala sha taalela omawupyakadhi ga yooloka, noga shunitha pevi eliko lyoshilongo, okwa kumagidha aaleli, nuumvo yalonge nuundhigini, nokweeta omalunduluko, okuhumitha komeho oshilongo, a popi ngaaka.
Geingob ta ti, nonando uulingilingi inawu dhidhilikwa moNambia, oya dhidhilike kutya aanapolitika mboka ya longitha uulingilingi oya yonagula edhina lyoshilongo shika.
“Shoka oshaningitha oshigwana shi kanithe omukumo neyinekelo. Otandi kumagidha kehe gumwe iikaleke kokule nuulingilingo oshowo okukonda oompango dhoshilongo, opo oshilongo shihume komeho nelandulathano,” Geingob ta ti ngaaka.
Omupresidente gwoshilongo esiku ndyoka okwa popi ta ti, omvula ndjika omvula yokulonga neyitulemo, nokuhuma komeho.
“Omvula ndjika otandi pititha omiilandu dhehumitho komeho omitiyali, moka mwakwatelwa okugalula eliko lyoshimaliwa nokuhumitha komeho oongeshefa moshilongo,” ta ti ngaaka.
Geingob okwakumgidha aaNambia yahulithepo omahepeko, nomadhipago moshilongo, ngoka ta ti okwadhidhilike ta gayi pombanda esiku kehe.
“Oshilongo shetu osha shuna monima unene komukithi gwoCOvid-19, ngoka natango gwa faalele oomwenyo dhaaNamibia oyendji. Omukiithi ngoka ka gushi ku dhimbiwa,” a popi ngaaka.
Geingob okwa li apandula minista gwuundjolowele nonkalo nawa opamwe naanilongo ye, sho ya kala nokulonga nuudhiginini okupititha nokugandja omayakulo kombinga yoCovid-19.