ǂHanu-aisib ministeris ge ra ǂâi!nâǁgui, mario!nâ !oabade ǂnoaba-aon !aroma ǁgui-aisa sîsenni ase ǂnûiǂgāsa, in ǀhûhâsigu ǁanin hîa nēti ī ǂhanusi !oabade ǁkhāba tama, xawe ǀgaisase ǂhanusi ǂnoabadi ǂhâsib !nâ hâna ǂnûǁkhaebahe ǁkhā. 

ǂHanu-aisib ministers, Yvonne Dâusas ge ǂoa ge Wunstaxs ais ge ūhâ i ǁgamǁares ǂnû-i !nâ ge mî, ǀnîkhamikō !gôab khoen !hūb ǂhanusi ǂnoabade a sī!nâ ǁoasa, ǀgapi ǂganǀgaub ǂnoaba-aon dib xa ra !aromahese. ǁNā-amaga i ge a ǂhâbasa, mario!nâ ǂhanusi ǂnûǁkhaebas !oabaden ga ǂnoaba-aona a māsa in ǀhûhâsib khoen hîa ǂhâsiba ūhâna ǂhanusi ǂnoabas !oabade sī!nâ ǁkhā. Ministers ge a mîs ge, ǂnoaba-aon nē sîsenni di !uru !gao!gaob “!oabasa ǂgurose marisa kurus ai!â” ti ra mîb ǁga ǁkhawa nî oasa. “ǂAuna Namibiaǁîn ge ûitsamaxūn âna ra ǂoa!nâ. ǁÎn ge omdi tsî ǀhonkhoe-ain a xūna ra ǂoa!nâ, ǁnâu!gâ!khaigu !nâ ǂnoabasens ǁkhāsiban ūhâ tama amaga,” tis ge ministersa ge mî. 

!Aruǀîs ge ǁîsa a mîs ge, ǁîs ministeris ge direktorats Legal Aids dis !nâ-ū N$304 miljuns xa a !nāsa marisa !kharu ge disi kurigu !nâ, ǂkhawusan hîa ǂhanusi ǂnoabade ǂhâ hâna huis !aroma a māǂuisa. Ministeris ge ra ǂâi!nâǁgui, ǀnî !ân ǂHanusi ǂNoaba-aon ǂHanumās 1995ǁî kurib dis !nâ hâna xoa-ūnusa, î-i khomaisen ǁkhā, hoa ǂhanusise ǂan!gâsa ǂnoaba-aona xu i ra ǂgaoǀkhāhesa ǁîn nî 120 irgu mario!nâ !oabade ǁnān hîa ama ǂhâsib ǂnoabahes diba ūhâ xawe a sī!nâ ǁoana mā. Nē ǂgaoǀkhās ge nausa ǁnā ǂnoaba-aon hîa ǀnai ǂHanugu ǂNûiǂgās Namibiab dis ra mîǁguisa !oa ǀnî ǀgau-i ai mario!nâ !oabade ǀhûhâsib !gâi!gâb !aroma dītoahâna xu nî ūbēhe. ǁKhāti ǂnoaba-aon hîa marisihuib, 120 irgu ǀnōba sī!nâ hâba kurikorobe ra mān tsîn ge nēs !nâ !khōǂgāhe tide. Hana-i ǂnoaba-ao-e ǀnîkhami ī !aromadi !aroma mario!nâ !oabade nî mâǁoas kara, o-i ge ǀawemā-!nans ǁga ǂganamsensa dī ǁkhā nē !âba xu ǁaraǂuihes !aroma. Ai!âkam sîsenǂuira direkters nē ministeris !nâs, Gladice Pickerings ge ge mî, nausab Namibiaba ǁnān hîa ǂhâsib !nâ hâna ǂhanusi huib !oabade hōs !nâ ra mâ!gâ, xawe di ge ǂnoaba-aon ra mā !oabade ǂâuǀoasa tama hâ. Pickerings ge ge mî, ǂnoaba-aon ǂâuǀoasa !oabade mās xa !nāsase ǁîn di hōǂgās xa ra ǂâi, khoena !oabas ai!â. 

ǁÎs ra mîsa !oa i ge, !nāsa ǂnoaba-aon ga ǀnîkhamikō !gôab mario!nâ !oabade ǀhûhâsib ǂkhawusa khoena nî mās karao, ǂhanub ra ǂhanusi ǂnoabadi !aroma māǂui marisa ga ǀoroǀorohe hâ. Ministers ge mîsa !oan ge, ǀarosen ra !gôab âi ǂnoaba-aona nē sîsenna taob !nâ ra mâi. 

“Mû da ge ra mâtikōsen ǂnoaba-aona sâuǁguisa ǂgaedi !nâ marina ǀhôakaose ra ‘ǂû’ !khaisa tsîs ge nē ǂûsa aitsama ǂgom!gâsens tsî ǂgom!gâb ǀhûhâsib ǂhanu-aisib ǂhanugu !nâ ūhâba ra habu,” tis ge ministersa ge mî.