Omusamane gomimvo 57 okwa si sho a Ii a ponokelwa kondjamba pethimkbo a li ta ende u uka kegumbo.
Sha ikolelela kepeko lyopolisi lyiiningwanima moshitopolwa shaZambezi, oshiningwanima shoka osha holoka Momukunda Siliumbu, ethimbo lyuusiku. Otaku hokololwa kutya omulumentu ngoka okwa li pamwe nayakwawo yaali, taya ende yu uka kegumbo, taya zi komukunda gumwe gu li popepi sho kwa li ya ponokelwa kondjamba ndjoka.
“Yakwawo mboka yaali okwa li ye shi pondola okumatuka po, nonando gumwe a li a monithwa oshiponga kashona,” opolisi ya ti ngaaka.
Oya gwedha po kutya nonando shoka okwa li sha holoka ethimbo lyuusiku, opolisi okwa li ya lopotelwa ashike esiku lya landula ko.
Omugandji gwomauyelele muuministeli womindhingoloko omatalelepo niihwa Romeo Muyunda okwa ti, ohashi uvitha nayi oku uva etumwalaka lyomuntu a kuthwa omwenyo kiiyamakuti.
“Ondjamba ndjoka oya dhipagwa nale kaanambelewa yanatiili,” ta ti ngaaka.
Uuministeli owa tseyitha kutya otau ka longekidha oshimaliwa N$100 000, shoku ongekidha efumbiko lyanakusa, ngaashi naana sha kolekwa kokatendo komilandu noompango muuministeli womidhingoloko. “Shoka itashi ti nakusa okwa futwa sho a dhipagwa kondjamba ihe okuyambidhidha aakwanezimo okulongekidha eso lyomupambele gwawo ndyoka lya holoka ombaadhilila,” ta fatulula ngaaka.
Natango uuministeli mbuka owa gandja omahekeleko kaakwanezimo yanakusa.
“Omaso ngoka ohage ya ombaadhilila, onkene pethimbo ndika otandi tsikile okukumagidha aakalimo ye li momahala ga nika oshiponga ya kale aluhe ya tala nokukondolola omindhingoloko dhawo.
Moshiningwanima inaashi faathana, omulumentu gwomimvo 33, okwa mangwa po kopolisi sho a tsu omusamane gwomimvo 58 negonga ngoka e li monkalo kaayi li nawa lela.
Omukuluntumugandji gwomauyelele gopolisi moshitopolwa shaMusati Moses Simaho okwa ti oshiningwanima shoka osha holoka oshiwike shika, momukunda Ontanda B moshikandjohogololo Onesi.
Otaku hokololwa kutya omulumentu ngoka okwa li a tsu omusamane ngoka negonga montulo oshowo molupati kombinga yokolumoho.
Ta ti, okwa li a tsikile okumundhengagula noshiti oshikukutu kokwaako kokolulyo, hoka a li a ningi iilalo oshowo a zindi.
Opolisi inayi tseya natango shoka sha etitha edhengo lyomusamane.
– vkaapanda@nepc.com.na