New Era Newspaper

New Era Epaper
Icon Collap
...
Home / Hendrick, Fredrick naAveshe va nhukila mondabo

Hendrick, Fredrick naAveshe va nhukila mondabo

2021-03-23  Festus Hamalwa

Hendrick, Fredrick naAveshe va nhukila mondabo

Nonande va dopa ondodo onhi-11 omudo wa dja ko, Fredrick Vaendwanawa, Hendrick Filipus naAveshe Gervasius inava tula omutwe kepepe, ashike ove litoola po, nova tokola okulongifa efimbo lavo mokuwapeka oshitalendi nohole yavo yoinyandwa. 

Ovanyasha ava ova tameka okudana oinyandwa omido nhatu da pita, ashike paife ova tokola okunhukila mondabo, noku shi ninga shi li oshitukulwa shomaifano avo. Tava ti otava ka eta oinyandwa tai yolifa, yoo otai tungu.

Ovanyasha ava tava ti vo nghee va dalelwe va kale omutumba komesho yoinyandwa ashike ove lilongela ashike movadani voinyandwa vakulu nokupula omayele fiyo tava pyokoka.

“Otwa fuulwa nokuxwaxwamekwa kovadani voinyandwa vakulu ngaashi Ndjeke yaMalimba navakwao va wedwa po, ove tu pa ohokwe yokudana oinyandwa i li melaka lOshiwambo,” Fillipus ta ti.

Ova ti ove na ondjodi yoku ka ninga ovadani voinyandwa kamana moshilongo, notava ilikana Ovasamalia ve va yambidide pashimaliwa opo va dule okuxumifa komesho ounongo wavo. 

Ova hokolola kutya ova taalela eshongo lomashimaliwa shokufuta omunhu ou ha tula kumwe oinyangadalwa yoshinyandwa shavo, nokulanda omafano okufaneka nosho tuu.

Omolwa ekwafo pashimaliwa olo va mona kuJackson Muma omunambelewa melelo laNgwediva, ova dula okutameka ongeshefa yavo ei yoinyandwa tava landifa ou-CD voinyandwa oyo va dana. Tava ti ovanhu otava dulu okutala oinyandwa ya yooloka, noka-CD kamwe oke na N$120. Ova ti ovanhu vahapu ove hole okutala oinyandwa yavo. 

Nonande nee tava dana oinyandwa, ovalumenhu ava ofikola inave i twa okati, ove lishangifa oNamcol opo va shiive va nawapeke oitwa yavo.

Tava tu ovanyasha vakwao omukumo opo ova longife ounongo ou ve na, opo ova dule oku eta po sha ngaashi naana voo va kufa etokolo liwa opo va ninge ovadani voinyandwa.


2021-03-23  Festus Hamalwa

Share on social media