Minista guundjolowele nonkalonawa Kalumbi Shangula okwa kumagidha oshigwana shi hulithe po okuninga iituthi moka aantu haya gongala oshowo oku enda iiyenda kaayina shilongo pethimbo ndika omukithi gwoCovid-19 guuka pombanda shinyanyaleka.
“Omukithi ohagu taandele mbala momangundumano, iituthi mbyoka tayi vulu okutegelela nenge okukalekwa, nayi kalekwe okugamena oomwenyo dhAanamibia,” ta ti ngaaka. Omwaalu gwaantu taya si ogu uka pombanda kehe esiku, omanga aantu nale aashona moshilongo. Ta ti, tu gameneni oomweenyo dhetu.
Shangula ta ti, nonando omuti ngoka tagu andjanekwa kagu shi gwoku aludha, otagu keelele poompito odhindji.
“Otandi tsikile okukumagidha oshigwana shi itule mo moku taamba omiti dhoku keelela omukithi ngoka. Shoka osho ashike tashi vulu okukaleka po oomwenyo dhetu,” Shangula ta ti ngaaka. Ta ti, sigo ompaka aantu ye li 936 oya sa komukithi gwoCovid-19 okuza esiku gwa ponokele moNamibia muMaalitsa omumvo gwa ziko.
“Omukithi nguka ogwa tameke okuya pombanda mekuthikuthi ndika tuli etitatu, onkene oshigwana otashi kumagidhwa kaashi hulithepo nenge shi sholole okugwanithapo oompangoo nomalandulathano ga tulwa po,” ta popi ngaaka.
Omwaalu gwaalongwa taya kwatwa kocorona, otagu ende guuka pombanda kehe esiku, noosikola dhimwe odha pata pakathimbo omanga taya ti po hwepo.
“Nonando omwaalu gwaantu taya aluka ogu li poopelesenta 88, otagu ende guuka pevi, , “ Shangula ta ti ngaaka.
“Otandi kumagidha oshigwana shi tsikile okugwanitha po nokulongitha iikeelelitho, okushonopeka oshowo okukeelela omukithi gwoCovid-19,” ta kumagidha.
Shangula okwa ti, omukithi nguka ogwa pimbila onkene oshigwana nashi simaneke okuzala uumasika momahala gwomangundumano ngoka itaaga vulu okukalekwa oshowo okwiiyoga koonyala ethimbo alihe.
Nonando epato lyoshilongo olina uuwinayi nuuwanwa wataalela aakalimo, aantu yamwe otaya indile ya shunwe konkatu yotango.
Omunangeshefa Maria Shuutheni gwomOshakati, okwati okuuvite ko kutya, epato lyoshilongo ohali eta ondjala oshowo omalunduluko ogendji, ihe okwati oshi vulithe okukanitha oomwenyo dhaantu.
“Omukithi oguuka pombanda oshoka ka tuna we uumbanda okugwanithapo oompango nomalandulathano , ngaashi kwali hatu shi ningi petameko,” ta popi ngaaka.
Ta ti, onkatu yo tango nayi galuke, sha ashike haya pewa ompito yokulanditha, opo ya mone osimaliwa oku eta omboloto po shitaafula.