Aakalimo moshikandjohogololo shEtayi itaya ka enda we oondjila oonde oku ka konga uuhaku kOshikuku, kOshakati nenge kOutapi, sho ya etelwa okakilinika popepi.
Oshiwike shika minista guuhaku nonkalonawa Kalumbi Shangula okwa patulula okapangelo momukunda Iipanda Yaamiti momundhingoloko gwOshikuku.
Okakilinika hoka taka ithanwa Oikokola oka li ka tungwa noshimaliwa shi thike poomilliona N$17.9. “Okakilinika hoka otaka kala haka talelwa po komundhohotola iikando ya yooloka moshiwike, opo aanumvu ya mone uuhaku oshowo kaaya tuminwe kiipangelo yokokule,’’ Shangula ta ti ngaaka.
Ta gwedha po ta ti, okakilinika hoka okape otaka ka yambidhidha oyendji yomomudhingoloko moka, oku ya konda omagulu oshowo okulongitha iimaliwa okuthika kiipangelo yokokule. Shangula ta ti, epangelo olya kala notali tsikile okulongela oshilongo shalyo uuwanawa oshowo okugwanitha po oompumbwe dhoshigwana. “Oshitopolwa shOmusati ngashiingeyi oshi na iipangelo iinene yi li ine, oosenda dhuuhaku dhi li hamano, uukilinika owu li 41 omanga omahala haga talelwa po ethimbo nethimbo ge li 142,” ta ti ngaaka. Ta ti shoka otashi ulike iiyimati yepangelo oshowo ohokwe nolukeno epangelo li na noshigwana shalyo. Shangula okwa ti shoka inashi ningwa ashike moshitopolwa moka ihe osha ningwa notashi tsikilwa okuningwa oshilongo ashihe. “Epango olya simana. Onkene oshigwana oshi na okugwanithilwa po oompumbwe ndhoka tadhi pumbiwa, okukaleka po omaundjolowele gawo, ” ta ti ngaaka. Okwa li wo a popi kutya iipangelo mbyoka yi li moshitopolwa shOmusati ohayi gandja wo natango omayakulo kaakalimo yokoAngola. Kansela gwoshikandjohogololo Etayi Hans Haikali okwa li a holola euvonawa lyokakilinika hoka ka patululwa moshikandjohogololo shawo.
“Ehumokomeho otali ende lyu uka komeho, nomauwanawa otaga ende taga thiki popepi. Aakalimo yomoshikandjohogololo shetu oya ningi aanelego oshoka itaya ka hinga we oondjila oonde taya ka konga uuhaku,” ta popi ngaaka.
Haikali okwa li a pandula epangelo sho lye ya yambidhidha ngaaka, ta ti okakilinika otaka ka yambidhidha oyendji.
Shilongo Ashipala gwomomukunda Iipanda Yaamiti okwa ti, itaya mana okupandula. “Onkundana ombwaanawa oyo ndjoka kutya itatu ka longitha we oshimaliwa shokulefa oku ka yakulwa kiipangelo yokokule. Okapangelo haka otake ke tu yambidhidha lela,” ta popi ngaaka.
Ta ti ota indile ashike epangelo opo lyi ya kongele ndohotola ta kalele, oshoka omasiku ngoka ndohotola ta ka kala ke po otaya ka thiminikwa okuya kiipangelo iinene. vkaapanda@nepc.com.na