Namibia okwa lopota iipotha yili 320 yina sha nuufuth gwoongaka, okuza omimvo ntano dha piti. Dhoka odha popiwa komupopiliko nomugandji gomauyelele muuministeli gwomindhingoloko omakuti nomatalelepo Romeo Muyunda momushangwa ali a pititha esiku oongaka kwali dha ndhimbulukwa muuyuni.
Ta ti, esiku ndyoka ohali dhimbulukiwa kehe omvo momasiku 19 gaFebeuali. “Okuza momumvo 2017 omwa lopotwa iipotha yoongaka yili 43, 2018 yili 62, 2019 yili 96 , 2020 yili 59 omanga omvo gwayi mwa lopotwa iipotha yili 60,” ta ti ngaaka. Muyunda okwa ti, oya ndhidhilike iiningwanima yaantu taya ikuthile ooveta dhokudhipaga iinamwenyo ya gamenwa yili pombanda unene, momimvo dha piti.
“Oongaka odha ndhidhilikwa dhili pombanda tadhi longelwa omiyonena omolwa ongushu yoshipa shawo oshowo omahinga goompanda ngoka haga longithwa wo natango kiilongo yokondje,” ta popi ngaaka. Ta gwedha po ta ti, iinamwenyo ngashi ongaka, ompanda oshowo ondjamba oyo iihakanwa inene omolwa oshimaliwa oshindji shoka hashi futwa.
“Esiku ndika otali dhimbulukwa muuyini, onkene nena natu mangeni oonyala kumwe nokutsikila okugamena oongaka, ngaashi naana dha ndhindhilikwa tadhi ende tadhi shonopala moshilongo,” ta kumagidha ngaaka.
Ta ti, oya nkondopaleke okugamena oongaka sho ya manga uukume kumwe nomandiki, oshigwana, etanga lyegameno no sho tuu, shoka natango sha kwathele okumanga aantu yethike 592 yaandhika noongaka oshowo niipa yoongaka.
Muyunda okwati, ongaka oyasimana moshigwana kaantu, kiinamwenyo oshowo momindhingoloko.
“Ongaka ohayi lyi iikwapuka mbyoka hayi vulu okulyapo omwiindhi, ngu guna okupalutha iimuna, onkene ngele opena oongaka ndha gwana ikwapuka mbyoka otayi likapo yi shonopale, kaayi mbugaleke,” ta fatulula ngaka.
Ta ti, otakumagidha oshigwana opo shi kalekepo oshininamwenyo shoka, nuuna gumwe a monika teshi longele omuyonena na lopotwe meendelelo. “Oompango ndhe geelo mendiki lyomindhingoloko odha nkondopalekwa, kehe ngoka taka adhika noshilyo sho shinamwenyo sha gamenwa nenge eshi dhipaga otapewa egeelo lyomimvo 15 mondjeendhililo nenge a fute oshimaliwa shoomilliona 15,” ta fatulula ngaaka.