Ngaashi naana ovanhu ve na oulema woshipa hava dana oshivike shavo keshe kodula okutameka 23 Okotoba, omupedupresidende wehangano lovanhu ve na oulema woshipa loNamibia Albino Association Trust Walde Kambabi okwa indila eefitola neehaputeka opo di shunife ondado pedu yomaadi ovanhu ve na oulema woshipa pefimbo tava dimbuluka oshivike shavo.
Kambabi okwa ti keshe kodula ehangano lavo ohali dimbuluka efiku lavo lovanhu ve na oulema woshipa, omo hava kala tava lande omaadi kombilixa meefitola da yooloka.
Okwa ti ota indile ovanhu opo ve va waimine okudimbuluka efiku lavo opo va landele ovanhu ve na oulema woshipa omaadi okuvava, omakende omutenya nomambale okudjala komutwe.
“Efiku letu neudo otali dimbulukiwa mOshakati omo twalela ovanhu ile omahangano opo etwetele omaano a yooloka. Onghee ohandi indile ovanhu aveshe ve na oulema woshipa opo ve uye momwaalu munene tu dimbuluke efiku letu,” Kambabi ta ti.
Kambabi okwa ti ovanhu ve na oulema woshipa onghee ngaa natango va talela eshongo lomaadi okuvava, unene tuu ava hava di komikunda.
Okwa weda po ta ti eendokotola dimwe onghee tadi twikile nokukala inadi hala okuudifa eefooloma dounona ve na oulema woshipa opo va dule okukala tava mono oshimaliwa shopendjela.
Kambabi okwa kunghulila ovanhu vena oulema woshipa opo va kale vena omukumo, yee ta weda po ta ti nava kale tava djala omambale nomakenda avo omutenya efimbo keshe ngeenge tava ende momutenya.
“Natu kale tu hole ovanhu vena oulema woshipa, fye natu va fimaneke. Oku kala una oulema woshipa kashishi omupya ashike omayambeko okudja kukalunga,” Kambabi ta ti.