Omukulunhuwiliki wehangano lokuongela oyuuuyemo yepangelo Commissioner Sam Shivute okwa ti oulingilingi tau longifwa keengaba nau lopotwe.

Edi Shivute okwe di popya  kefiku ledimbuluko lomayakulo okeengaba Etine Oshikango moshitukulwa.

Shivute okwa ti NamRa ota lalakanene okukandula po oumbudi noulingilingi tau longifwa keengamba.

"NamRa otaka longela kumwe nopolifi noshoyo okakomisi haka ungaunga nedengelo lodi peisho moshilongo okukala tava lwifa oulingilingi," ta ti.

Moshipopiwa shaye Shivute okwa ti osha fimana ngeenge oshiwana tashi futile oishoshela yoinima yavo keengamba shaashi oshimaliwa osho hashi futwa ohashi longifwa koikondo yomayakulo a yooloka moshilongo noshoyo okuyambula po eliko.

"NamRa ota twikile nokuyandja omayakulo koshiwana keengaba ngeenge tashi eta oinima yavo meni loshilongo. 

Onghee osha fimana opo oshiwana shi kale tashi longele kumwe novanambelewa voNamRa," ta ti.

Okwa weda po ta ti NamRa ota lalakanene yoo vali okukala a lundulula onghalo yovanambelewa keengamba opo va kale tava longele momudingono u li nawa.

Efiku olo ovainalonga voNamRa ova pewa omudjalo mupe wokukala tava djala koilonga.

Moshipopiwa shaye ngoloneya waHangwena Walde Ndevashiwa okwa pula NamRa opo a twikile nokuyandja omayakulo pauyuuki keengaba.

"Ohandi indille NamRa opo e uye kelelo laHeleao Nafidi opo va kundafane oinima ya yooloka oyo tai dulu okuxumifa odoolopa komesho," Ndevashiya ta ti.

fhamalwa@nepc.com.na