Yomuhulu waofesi yebona zalipapali mwanaha Namibia (NSC) Freddy Mwiya, viki yefelile natuzi likwambuyu walipapali Agnes Tjongarero, kasamulaho Khuta Yepahami nelaezi kuli tumelelano yamusebezi wahae iekezwe kalilimo liketalizoho. Komano yamulao mwahala Mwiya ni Tjongarero nekalile kasamulaho katengo kapili kaNSC, neka file kelezo kuli tumelelano yamusebezi ya Mwiya iekezwe kalilimo zeñwi
liketalizoho. 

Katengo kakale nekafile Mwiya nepo ya B hala musebezi wahae kakuba muokameli waofesi yebona zalipapali, mi sekafa kelezo kulikwambuyu kuli akutisezwe fasitulo kuisa silimo sa 2027.

Kono Tjongarero nahanile kunyatela kelezo ya katengo, mi afa taelo yakuli situlo sihatiswe patalaza kuli bayahi babañwi banaha Namibia babatabela baicumbele kwateñi. Tumelelano ya Mwiya nefelile la 31 Lyatamanyi 2022. Katengo kiha kahana kutaleleza taelo ya likwambuyu, ili kalulo yene tisize kuli kalundulwe mwakweli ya Kandao unumwaha, kakuba ni mahanyi nikuhana kulatelela litaelo kuzwelela kwakamaiso yeba beile famusebezi ni ofesi yamuyemeli wamuuso. 

Mwiya kihaya kwakhuta kubata tuso, ili fokutezi tumelelano yakuli uka siala fasitulo sahae kufitela taba ifela. Tumelelano yeo yene ezizwe taelo ya khuta, nebulela kuli Mwiya una ni kuamuhela tuwelo yefumanwa kimitayi yeñwi yaliofesi zeluilwe kimuuso. Labubeli viki yefelile Khuta Yepahami kiha ilaela Tjongarero kulatelela mulao ni kucafaza/kuekeza tumelelano yamusebezi kukala la 1 Muimunene 2022 kuisa la 31 Muyana 2027. Likwambuyu hape nalaezwi kulifa lisinyehelo za Mwiya zamuzeko.