Sada !hūb ra ai!gû garu Covid-19 di ǀnî hâs xa ǁnāǂamhe soab ain ge ǀgui sâǁaeb !nâ 129 skolǀgôana positifse nē ǁōsa ra !âihe, ǁkhātib nē !gôaba ǀhaehe rasa !oa wekheb tsēdi !nâ ge ǂharose. Nē !gôab ge ǁgau!nâs ministeris di dana sîsenǂuira direkters Sanet Steenkamps x age mā!kharuhe. 

Covid-19 ge !kharu ge ǀgam kurikha !nâ !kharagagu !âgu sîsengu diga ǀgaisase ge tsâǀkhā, ǁgau!nâs tsîna ge tsâkhāse, nausas, ge ministerisa nē !gom ge i !nae!khade xu mâtis nē mâsib !nâ nî sîsen ǀgauga a ǁaǁahe tsîs ǁnā-amaga nēsi ǀguis khami ī ǀaweǁgui-i skolga ǁkhawa nî ǂganamse is dī-e ūhâ tama hâsa. “Tita ra ǀaro ǂgaos ge, ministeris ǀguis khami ī ǁawosasi-i ǀkhas tsîna a mîǁoasa, ǁkhawa i !gau!nâs !nâ !khom!nâ-e  hâ tidesa, ǁnā-amaga da ge ra ôa-am hoaǁae ǂhomisase hâsa. 

Covid-19 ǁōs ǂnamipe hâ ǂâiǂhansendi tsî !gaesendi tsî ǁkhāti nē ǁōs ai!â ǀgaisase khoraǂuisensa ǁkhaes ase da ge ǀgam semestera nē kurib !aroma kurib di tsoatsoas ai ge ǂgâxa-ū, în ǀgôan tsî ǁgau!nâ-aon tsîna ǁnā ǁaeb hîa kaise a !khaiba ǁgâudi tawa hâ ǁkhā, ǁaupexa koro wekhega !khōǂgā hâ skolmâiǂuisa ūhâse,” tis ge Steenkampsa ge mî. 

ǂGuro semesters hîa ǀgam wekhekha ǁaeb !nâ nî !gûǀams !nân ge ǁgau!nâ-aona ǂauna ǁaeb hîan kurib ǁkhāǁkhāǂgaekhâiga nî dītoa tsî sîsenna ǁkhawa nî !gû!gâba ge māhe. Steenkamps ge noxopa gere ǁawosasib ǀkha gere ǀgonǀgon!gao !khais ge, ǁîn ra nē mâsiba ǂōrisase kō!harasa, hâ ǁkhā kai !khom!nâsa skolgu tsî ǁgau!nâs !nâ ǁkhaubas ase. 

“ǀGui!nonaǁî!âb (850 000) nē !hūb ǁanǂgāsaben dib ge a skolǂgâ ǁhās ǀgôa tsî skolgu !nâ hâ. Sida ge a ǂan, ǀgôan hâǁare nîse ī !khaisa tsîb ǁkhāti skola a ǀhûhâsib !â tsîn nē ǀgôana !kharaga ǀhûhâsiga xu skolgu ǁga ra hāsa, tsî da ge nēn hoana ǂâis !nâ ūhâse, ǁkhā da as kōse aiǂhomisen hâ, hâ ka ǂōǂōsiga da nî ǁkhau ǁkhāse,” tis ge gere ǁawoǁawo.

Steenkamps ge ǁgûn tsî ǀhûhâsigu ai ǂgansa ge dī, skoli !augan ǁîna nî ǁawoǁawosa nē ǀgôan ǂgaoǀkhāsa ǂurusib ǁgaraga nî ǁnâuǀnam !khaisa. Nē !gôab 229 diba xun ge 57 ǀgôa tsî 11na a ǁgau!nâ-ao.