Victoria Kaapanda

Minista gwuuhaku nonkalonawa Kalumbi Shangula okwa kumagidha oshigwana shi ikaleke kokule nokutuntilwa nomiti kehe.

 “Momasiku 18 gaAguste, talele lyuundjolowele muuyuni World Health Organisation (WHO) okwa li lya pititha kutya kiilongo India oshowo Uganda okwa li taku taambathanwa omiti dhooCovishield dhiifundja,” ta ti ngaaka.

Ta fatulula ta ti, Namibia oku na omuti gwoCovishield gwoshili, ngoka a pewa okuza hoka hagu longwa lela koIndia.

“Omiti dhetu adhihe dha tambulwa kepangelo lyaNamibia odhoshili, ihe otatu kumagidha oshigwana kaashi wende nomiti kehe inaadhi pitila momandiki gepangelo lyetu,” ta kumagidha ngaaka.

Shangula okwa kumagidha natango oshigwana kaashi itaale omawuyelele taga taambathanwa kutya ope na omiti dhimwe dhoAstraZeneca kaadhi shi dhoshili.

Ta ti, oshigwana inashi kala shi na uumbanda oku ka tuntilwa omolwomawuyelele ga puka taga gandjwa kombinga yomiti dhokutuntila.

“Itatu vulu okupitika omiti dhiifundja moshilongo shetu, nongele opwa holoka epuko lya fa ndyoka, uuministeli otawu shi tseyitha mbala, kutya ope na omiti dhontumba kaadhi shi dhoshili,” ta  popi ngaaka.

Shangula okwa ti, oosikola odha lopota dhi na iipotha yoCovid-19 tayi ende yu uka pombanda, oshilongo ashihe.

“Ngele oompango nomalandulathano ga tulwa po, okukeelela etaandelo lyomukithi ngoka, ompito yomukithi nguka otayi holoka, shoka tashi eta natango epato lyoosikola,” ta popi ngaaka.

Minista okwa ti, aanilonga mendiki lyelongo naya itule mo mokugwanitha po omalandulathano oshowo okukondolola aanona yosikola ethimbo alihe.

Ta gwedha po ta ti, omaso otaga ende ga uka pevi, ihe agehe ngoka ga lopotwa omasiku ngoka, ogaantu mboka inaaya tuntilwa.

‘’Okukeelela okuvule okupanga, onkene thikameni mu ka tuntilwe nena,” ta kumagidha ngaaka.

Ta ti, omwaalu gwaantu taya aluka komukithi nguka ogu li pombanda.