New Era Newspaper

Icon Collap
...
Home / Kwato kulifutira mugara gomoGobabis vana kugazarera asi kwadipaga

Kwato kulifutira mugara gomoGobabis vana kugazarera asi kwadipaga

2021-06-03  Roland Routh

Kwato kulifutira mugara gomoGobabis vana kugazarera asi kwadipaga
Top of a Page

Mupanguli gomunene mompangura zaVenduka, Naomi Shivute katente asi kuna kumoneka nawa nawa asi mugara ogu gomoGobabis, ogu vazegurura modorongo morwa kupitira melikwamo lyaPresidente gosirongo ngesi kuna kumoneka asi mugara ogu mudigu edipango lyendi lyokuhova ntani eli lyauvali nayinye yahepa kumutamba ntani. 

Mupanguli kakandwirepo ehundiro asi ngano alifutire Petrus Hoxobeb gonomvhura 57, omu yiana mutamba asi age kwadipaga Josephine Afrikaner omu gamutwire nombere yikando yina kusika ko muyu(9) kongura zomazuva 14 Pembankuru 2019. Mokukwama nye omu lyahorokere ehudi olyo, Hoxobeb ntani munyandi kwakere meharo komeho tupu nye yimutwarederere konomfa, makura age kuna kutanta asi kapi gahamenene mosimpagwa oso. 

Mokukwama mupanguli, katante asi epangero lina kara nosihorokwa sousili kuhamena Hoxobeb, ano makura nye morwa ngoso kapi yina kumoneka asi atundemo nokulifutira morwa vantu kapi tava yihafere ntani ngendeseso zetu zonoveta kapi taziyipulisire. 

Mapanguli simpe katente asi ogu Hoxobeb simpe kunaa kara hena nomarapoto gavali limwe lyokudipaga ntani limwe lyokusandagura mukadi negano asi ngano amurugane eyi gahere. Moyo yipangura oyo age kwamugwene epuko lyokudipaga mukadi ogu gakara asi zinya vana vendi, omu vamutengekere akare modorongo nomvhura 25. 

Makura age kwakeremo tupu nomvhura murongo nomakwedi ntazimwe makura tava mupwagesamo kupitira melikwamo lyaPresidente. Shivute kuna kutanta asi mugara ogu kapi gakara nefumadeko lyovantu ndi asi nage ngano akwame veta.  

Eyi yina kumoneka hena ngesi asi nepu natumugwana epuko hawe age takakara nye modorongo siruwo sosire omu nayimutamba asi age tazi modorongo kwahana egazaro peke. Moomu tupu asi ehundiro lyendi kuna kara lyokudipaga, hawe kapi nagwana hena asi alifutire akare ponze. 

Nsene apwaga hena ngesi hawe veta zetu kapi tuna kuzikwama ntani vatungimo nawo vana kara nowoma. 

Mongurova nye ozo zo 14 Pembankuru 2019, munyandi kwakere ana pwaga povakwawo zendi pombaha. 

Makura age kwavasigire tanko akalivatereko. Opo gazire ngoso kwakamundindilireko mukwawo zendi Esmie Thomelo, ogu ana kara asi nage gumwe gapita momasanduro ogo. 

Makura Hoxobeb tavakwama age ana simbi mbere, makura tazipwagesa kumwe nokutwa nye Afrikaner. 

Apa nye mukwawo zendi Thomelo gahere asi apopere, nage tamutjilisa asi ngano tamutu mbere. Munyandi kwadogorokerere poopo, morwa honde kwapoposere noyironda nye oyo gakere nayo komutjima ntani komapunga.

Hoxobeb makura taduka pevango olyo, age kwakamuhamata monondundu yimo gakavende moruha rwaGobabis. 

– rrouth@nepc.com.na


2021-06-03  Roland Routh

Share on social media
Bottom of a page