WINDOKO – Manzwi amatomola pilu anze ataha kulatelela mubakanyani wa makande wa mutende wa New Era ni mubihi kanako yetelele Chrispin Inambao, yana timezi mwasipatela mwa Windoko, kasamulaho akukula butuku bwa kensa nako yetelele. Balubasi, bene abeleka nibona ni babali ba New Era nebawezwi kasamulaho alifu la Inambao, mi buñata nebapakile wa lilimo zemashumi aketalizo kuli neli mutu yana sebeza katata, ili yana lata hahulu musebezi wahae wakuba mubihi ni mubakanyi wa makande. Mubakanyi wa makande usiile bana babane. “Kakusebeza katata ni cisezo yahae, nyandi Chrispin Inambao nabile ni kabelo mwa kubupa naha kakuzwiseza pata tukuluho ya bamakande,” nekubulezi ofesi ya Mueteleli wanaha.

Muzamaisi wa kampani ya New Era Christof Maletsky naize mutayi ulatehezwi ki mubeleki sakata ni sikombwa sesi sepahala. “Chrispin nabelekezi New Era lilimo ze 16 zabupilo bwa hae. Natahanga kwa musebezi nihana utwa butuku bo butuna,” nabulezi. “Nako yeñwi luna bene lubeleka niyena nelu makala kuli nakwanisa cwañi. Kono, Chris nabulela kuli nafilwe musebezi kubelekela mutayi, mi neli tukelo yahae kubeleka katata. Lu lila ni lubasi mwa nako yetata ye bali kuyona.” Yene ili mubakanyi wa makande wa muzamaisi Toivo Ndjebela, yana belekile mabapa ni Inambao pili asikaya kwa mutende wa Namibian Sun, ni yena nafitisize manzwi ahae.

“Chris neli yomuñwi wabatu baba sebeza katata mi neli tompo kubeleka ni yena. Kona nto yene ni tabela kuyena. Tisezo yahae nesakoni kulikanwa.” Yene ili mubakanyi wa makande kwa New Era, Raja Munamava, naize: “Chris neli mubihi wa makande ya kanya, kakuli muñolelo wahae no ikemezi, mi naziba hande kusebelisa puo ya sikuwa. Nalata musebezi wahae mi nabelekile katata kwa kuhula kwa New Era.” Yene ili muzamaisi wa New Era kalilimo zesupile Sylvester Black, naize Inambao neli muuna yana sa sutiswi kusa lumela kusona, ni kulatelela milao ya bamakande. “Chrispin natongwama buniti mi naisiala kuba mubeleki sakata. Uka zwelapili kuba mutala kuli mubihi sakata uswanela kuba cwañi,” Black nabulezi.

Max Hamata yana belekile ni Inambao kwa mutende wa Namibian, nabizize lifu lahae kuba lisuba leli tuna mi namupakile kuba yomuñwi wa babihi yana sika lemuhiwa hahulu mwanaha. “Chrispin neli muñoli yana ni lyano mi naziba kubakanya hande likande, kuli mubali nakona kuikutwa kukena mwa likande,” nekubulezi Hamata. Tangeni Amupandi kuzwelela kwa Namibian niyena nafitisize manzwi ahae amatomola pilu. “Kakuyemela beni beleka ni bona kwa mutende wa Namibian, Tukuluho ya Bamakande nina kasibili, muamuhele manzwi amatomolapilu kutaha kwa babeleki ba New Era, sihulu babihi ba makande, kulatelela lifu la Inambao. 

Ndumeleti wanaha India mwa Namibia Prashant Agrawal naize bamakande balatehezwi ki singangalume ku Inambao. “Luzibile mutompehi Inambao isi feela mutu yana sina lyambamba, kono nana ni buniti, nasebeza katata mi natisize tumbo mwalitaba za bamakande, neli mutu yasina katowati. Tukuluho ya bamakande mwa Namibia ilatehezwi ki singangalume,” nabulezi. Mwanako ya kubeleka Inambo ubile mubakanyani sakata wa makande mwanaha Namibia, ulutile bañoli bamakande babañata. Nabelekezi mutayi one uyemela bamakande, mutayi wa makande wa Nampa, mutayi wa makande wa Namibian, kufitela aketiwa kuba mubakanyi wa makande kwa New Era kasilimo sa 2003.