KATIMA MULILO – Kezahalo ya kukonkiseza bayemeli batolopo ya Katima Mulilo yene swanela kuezahala Labune, ne isizwe kwapili kasamulaho limembala zetalu zalikopano zelwanisana neli iketezi kutondahala kwakezahalo. Mukopano one uswanela kuezahala kanako ya 09h00, nokansuzwi kanako ya 10h30 kasamulaho bane bamemilwe, kungelela cwalo ni muatuli yomunyinyani nebasiilwe balibelezi kufitelela hola kusina kutolokewa kuli neku ezahalañi. Kasamulaho atibelelo yetelele muzamasi watolopo ya Katima Mulilo Rahael Liswaniso, akambama fakatala nikuzibahaza kuisiwa kwapili kwamukopano kwalizazi lene lisika patalazwa, kusina kutoloka libaka lene litisize cwalo. 

Kono libaka neli bonahala fokusweu kakuli membala waIPC Charles Musiyalike, membala waNDP Watson Kalaluka ni membala waPDM Lascan Sikosi, nebana ni mukopano wabona kwasibaka sisili kone bazibahaza mulelo wabona wakutondahala. Hala mabaka amañwi babulela kuli banze bakungulelwa kwatuko kibayemeli baSwapo. Mwaliñolo lene liñozwi la 17 Njimwana 2022 lene liya kumuinasipula, Musiyalike nafumbela kushonga bayemeli babañwi babalwanisana, kutondahala kwakezahalo yakukonkiseza haiba habana kutelezwa. Musiyalike naize “hakuna kolo mwamulao ozamaisa milonganyana wabu 23 wasilimo sa 1992, sina mone utalimezwi sinca, ofa kuli kopano iliñwi yena nibayemeli babañata ino ketelwa mwalitulo zabutokwa inosi zecwale kamuyemeli watolopo, mubakweli muyemeli kapa muinasipula wakatengo.”

Nabulezi hape kuli kauhanyo ya 11 yamulao ozamaisa milonganyana, ubulela kuli bayemeli baswanela kuketelwa mwalitulo zabutokwa “kuzwelela mwahala bona, kusabilaezi kopano kobawela kapa kopano yena nibayemeli babañata”. Musiyalike nabilaezi hape kuli bayemeli banze bakutisezwa mwalitulo kakutalima kuli bawela mwalikopano zeswana nikuli “litulo zabutokwa liswanela kungiwa kakutalima zeo mutu aezize hande.” Sikosi nahatelezi kanako yamukopano nibabihi bamakande kuli “lubata kuli litulo zeo lino cincanwa. Lubata kuikabela litulo. Haiba kusa ezahali cwalo haluna kuba nikabelo kwakonkisezo, mi haluna kulemuha yakaketiwa.” Kalaluka naize katengo katolopo ya Katima Mulilo seka totobela bakeñisa kamaiso yambwashula, mi seli nako yakuli bayemeli babeele kemelo yalikopano zabona kwatuko nikubelekela sicaba. “Katengo katolopo seka totobela. Lika halizamai hande. Hakikalibaka la luna (likopano zelwanisana). Kikalibaka la batu babañwi babasalati kuteleza kuli lukona kutusana cwañi,” nahatelezi.