New Era Newspaper

New Era Epaper
Icon Collap
...
Home / Likwambuyu ufa mamela hala kuzuma isi kamulao

Likwambuyu ufa mamela hala kuzuma isi kamulao

2022-07-04  Aron Mushaukwa

Likwambuyu ufa mamela hala kuzuma isi kamulao
Top of a Page

KATIMA MULILO – Likwambuyu waSilalanda, Mishitu ni Bupoti, Pohamba Shifeta, uelelize limembala zalibakanyana zapabalelo yalifolofolo kuambuka kuzuma isi kamulao nikusinyasinya masheleñi. Nabulezi hape kuli likolo lisinuzi kubateñi kwakuzuma isi kamulao mokuitengile limembala zalibakanyana zapabalelo zalifolofolo. 

“Kwanu, mwasikiliti se (Zambezi), batu nebatamilwe. Muinasipula, bazamaisi ni limembala zakamaiso nebatamezwi kuzuma isi kamulao. Ufilwe kubabalela limbule, wena wauzwa. Kuswana inge kubea sitongwani mwamulaka walingu. Kuswana inge kikezo yabusholi bwakulela yefumanwi mwasibakanyana seo sapabalelo yalifolofolo,” nekubulezi Shifeta.

Nabulezi zeo kwamukopano wabazamaisi balibakanyana zapabalelo yalifolfolo, ni mishitu yasicaba kuzwelela mwalikiliti zamutuloupa wanaha, one ubile teñi mwaKatima Mulilo Labune. Kacwalo nakupile sicaba kuketanga batu babatokomela liswanelo zasicaba. “Haluketa batu babasasepahali, lutahisa taba yakuli baikenye mwakozi,” naelelize. 

Nabulezi hape kuli uamuhezi likakalezo zeñata zakusinyasinya masheleñi alibakanyana zapabalelo yalifolofolo. “Luamuhezi lipilaelo zeñata kuamana likakalezo zeo zabusholi ni kusinyasinya masheleñi, taba yeo iswanela kufela,” likwambuyu nafile mamela. 

Mukopano notisize hamoho bazamaisi balibakanyana zapabalelo yalifolofolo ni mishitu yasicaba kuzwelela sikiliti sa Zambezi ni likiliti zepeli zaKavango, kutonyatisisa nikutalima litulo, butata ni zende zebatalimana nizona.


2022-07-04  Aron Mushaukwa

Share on social media
Bottom of a page