ν Steven Klukowski

Oliver Nkando ni wahabo Medina Windstaan bahanile kubo yabubotana bakeñisa kuli haba beleki, kakueza simu yamiloho kwamulaho andu yabona, kufepa babapila mwakomponi ya naikahela ya /Gereres kwanda tolopo ya Keetmanshoop. “Nelu likile sapili kukwalula kantolo kane kalekisa zabutokwa zecwale kalinkwa ni swikili hala zeñwi, kono selubona kuli lututele kwakulima miloho,” nekubulezi Nkando.

 Naize bacala miloho yecwale ka sipinaci, cabici ni karoti kufepa lubasi lwa bona, hamoho cwalo ni kulekisa kwabayahi baba saipumaneli hande fateko yecipile.Nkando walilimo zemashumi amalalu kazetalu naekelize kuli bakona kufumana N$100 mwaviki kakulekisa miloho, ili yebatusa kuleka mezi kuselaelisa miloho yabona ni kulula sico fatafule. Nabulezi hape kuli nebakonile kuluta yebabapani niyena kuamana ni mwakulimela miloho, mi kanako yacwale sacala mahapu ni matomato. 

Medina yena walilimo zemashumi amane kazetalu nabulelezi mubihi yo kuli nabelekanga kakuba muapehi kwasibaka sesi apeha lico, kono naletehezwi musebezi hae bakeñisa butuku bwa Covid-19.

“Kacwalo na ni mulikanaka selutaha hamoho ni kukala purojekiti yakubabalela basupali ni banana mwalubasi,” nabulezi. Lubasi hape nelukupile neulo kubabakona kubatusa kuleka litoze ni muuso kubafa mubu. 

“Mwanzila yeo lukona kuyandulula purojekiti yaluna nikukenya babañwi, mi kakuba sicaba lukona kukala nto yeñwi yeka mbweshafaza mayemo aluli kuona, kufita kulibelela lico kuzwelela kwamuuso,” neba bulezi.