Hileni Mwandingi

GOBABIS - Ministeragona goruha rwakarerapo vantu ava avaparuka nourema momberewa zapresidente Alexia Manombe –Ncube, kakadingwire mukunda gwaOmaheke, sivike kasipwire omu kakagwanekerere novantu vakuparuka nourema nokukagava uhwi ou zagwana mberewa zendi. 

Manombe –Ncube nombunga zendi kavasikamene nakauke pevango lyaOmitara kumwe nokutjanga vantu ava ava paruka nourema omu navakagwana mbatero zomaumwene komeho vakatwikire koGobabis , oku nye kavakageve yiruganeso yovamusikante kombera zanguuru, ntani yiruganeso yovakadi komeho vana yitambesere kupitira nye momberewa zakansela gomukunda ogo. 

Mokugava nye yiruganeso eyi, eyi zagava mbunga vana kutumbura asi Basic Affordable Sustainable Services (BASS) , mbunga ezi zakara asi zokutunda koNetherlands, Manombe –Ncube katente asi yininke eyi kuna yitambesere vadinkantu ava va paruka nourema vakara asi kwahara ndi klwakara noudivi womusika. 

‘’BASS kwawiza komberewa zetu nokuyagava uhwi ou, unene kovadinkantu ava paruka nourema momukunda gwaOmaheke. Awo vadimburura nare asi wolye vene owo vadinkantu ava vana kuparuka nourema vakara hena noudivi wokuhamena musika. 

Ose, ngesi kuna kuyagava nye uhwi ou, komberewa zanguuru gomukunda ogu nye ngakayisikisa kovantu owo yina tamba, yimo ana kutanta Manombe-Ncube. Age kagwedereko asi BASS simpe kwagava yimwe youhwi komberewa zendi, yina kara asi yipundi yokugendera wokurema ntani yimwe ngoso yokuvhura kuvavatera eyi yina kara asi nayo ngavayigavera kowo yina tumbukire sirongo mudima.

Komberewa zomukunda moGobabis, Manombe –Ncube kakeve uhwi kowo yina tumbukire vakadona gona vakara asi kuparuka nourema. 

Yipakote ntantatu yina kara momukaro goyipakote, omu muna kara mudwaro govakadi, nonsewa ntani yimwe ngoso yokuruganesa yipo muntu okare ono kanguka eyi kwayigava mbunga zo UNFPA. 

Age makura yipo kakatwikilire koEpukiro, omu kazire simpe nelikwamo lyendi lyokudingura nomukunda omu simpe kakageve yimwe hena yooyo yovakadi kovadinkantu kadona vana kuparuka nourema.