Rose-Mary Haufiku
Nkuru sure zaNamibia mukuronagona gwazo Kenneth Matengu kahundilire nokugava makorangedo kovarongwa ava vana kara womvhura zokuhova ntani navavanare vahepa kutambura maudigu nokugatara asi vahepa kugagusapo.
Age kahuyumgire nonkango edi posiruwo sokupatiurura nkurusure momumvho 2022 posure zawo zedina asi Hage Geingob zakara moVenduka sivike kasipwire.
Age kavatanterere asi kwato mbungururu azimoneka nsene kwato mundema apa nye apa akukara mundema hawe nombukururu tadiruganesa siruwo oso mokumoneka nawa nawa. ‘’ Nkenye udigu una kuwiza wahepa kutara nawa nokuugusapo, eyi nani mutantera ngesi asi mwahepa kutara nkenye udigu, wahepa kuutara nawa ove hena odive asi wahepa kuugusapo, yimo ana kuhundira ngoso Matengu.
Age simpe katwikilireko asi ngovarongwa, awo vahepa kuruganena kumwe yipo muwapukurure maparu geni nkenye gumwe kuna kukundindira pomundinda goge okasikisemo eyi ono hepa kukakara.
‘’ Eli kuna kara nye ekanderero lyange kwanamuvenye-morwa kuna mutamba maudigu gomanene unene, omu yna kara asi eparu lyahepa kureta udigu ou nkenye kweni.
Gumwe goponkurusure gwanare Ndjodi Ndeunyema nage kageve magano gendi asi mokutara ogu twatunda magano kuwiza momuntu, utjirwe ntani kukara nomagano dona komazuva gawo gokutameka, wahepa kuukandurapo ntani nokuutara asi ngapi nougusapo.
Age kuna kumuhundira asi mwahepa kurugana ngoso, yipo mutare asi ngapi napa wiza marunduruko. Mokukara muriongwa ogu apitakana mokurugana, nokulikida mukaro gomuwa, mwahepa kulikida omu mwalironga nomukaro gomuwa, nokudiva asi nampo ove kwatunda pokamukunda gona makura mukunda ogo gwahepa kukara moge ntani wahepa kudiva asi ngoretesapo erunduruko pevango olyo. Ndeunyema yimo ana kutanta ngoso.
Nkurusure ezi zina kara asi kuna kara novarongwa wokusika ko 30 000 ano varugani wokusika ko 2 500, ngesi awo kuna tura asi mvhura ezi 2022, zahepa kukara zomutaro, morwa nkurusure ezi ngesi tazi kagwanesa nomvhura 30 morwa kwaziturapo mo 31 August 1992.
Mositurwapo sawo sina kara asi “Gwanekera nonkurusure – UNAM at@30, nkurusure kuna kukadana mokudiworoka nomvhura edi noyiviyauka yokulisiga siga mwaza mvhura nazinye.