Aakalimo yokiitopolwa yokonooli Oshana nOmusati oya kumagidhwa yi iyuthe koompango oompe dha tulwa po okukeelela etaandelo lyoCovid-19. Omupopiliko gwopolisi gwoshitopolwa shaShana Thomas Aiyambo okwa ti, Oshana oshi li metifa okugwanitha po nokukeelela kehe shoka tashi yi moshipala oompango nomalandulathano okukeelela omukithi gwoCovid-19 gu taandele.
“Kehe ngoka taka monika ta piti moondjila dhomooha okuhenuka omboloka yopolisi, otaka mangwa nokupewa egeelo lye,” ta ti ngaaka.
Aiyambo ta ti, oshigwana oshi uvite ko onkalo tu li muyo, onkene nashi hulithe po okweenda iiyendo inayi pumbiwa, okukeelela etaandelo lyomukithi ngoka.
“Mboka taya uthwa okupiita poomboloka, oomboka ashike ye na oombapila dhepitikilo. Oombapila ndhoka otadhi ka gandjwa ashike kwaamboka taya ka gandja omatompelo gongushu,’’ ta popi ngaaka. Ta gwedhapo ta ti, mboka yu uka koosa, otaku pitikwa ashike aapambele yopopepi nanakusa, moka mwa kwatelwa yina, he,nenge mumwayina lela muhe nenge muyina. Aiyambo okwa kumagidha wo natango oshigwana shi gwanithe po omalandulathano agehe ga tulwa po.
Ta ti, opolisi yaShana otayi longo nuudhiginini okukwashilipaleka kutya kehe elandulathano olya simanekwa.
Omukuluntu gwopolisi moshitopolwa shaMusati Titus Shikongo okwa ti, Omusati nago ogu li metifa okukondolola nokukwashilipaleka kutya omalandulathano agehe otaga landulwa ngaashi ga tulwa po.
“Omalandulathano ngoka ga tulwa po naga kale oshinakugwanithwa shakehe gumwe, inamu tegelela okuthiminikwa kopolisi, omolwuuwanwa wetweni atuheni, opo tu vule okusinda omukithi nguka gu li mokati ketu,” ta kumagidha.
Shikongo okwa ti, mboka ye na omadhilaadhilo notaya ka kutha omatokolo gawo yene, okuyaka oondjila dhomooha, otaya ka pewa egeelo lyawo.
“Ngoka ta ka pewa ombapila yepitikilo, ongele a gandja omatempelo gongushu, nopolisi otayi ka kondolola uushili musho,” ta ti ngaaka. Kundana sho a li aningi omapekapeko moshigwana oyendji otaya iiyutha koompango, ngaashi omahala gomaninwo ohaga patwa pethimbo nomomasiku ga indikwa ga patuluke.
Opolisi oya kumagidha oshigwana kutya kehe ngoka taka adhika ta landitha omalovu momasiku ga indikwa otaka pewa eegelo lye.