Katengo kasikiliti sa Zambezi kasweli kuitukesaza muunda, mayemo amezi mwanuka ya Lyambai habonaqhala kunanuha kabubebe. 

Kamaniti minzi yeñwi sekauhezwi kwalisebelezo zasicaba sina limotikala hase lisakoni kufita teñi. Labune mezi nayemi fa 5.15 m hakubapanywa ni 2.13 kanako yeswana ñohola. Mwangambolo ni New Era mubusisi wasikiliti sa Zambezi Lawrence Sampofu naize libaka zeñwi halisakonwa kufitwa kamotikala bakeñisa muunda. 

“Nuka ya Lyambai inze inanuha
 kabubebe. Mutayi watuto ukalile kuitukiseza. Luitekezi muunda omuñata nuka haibonahala kuzwelapili kunanuha,” nekubulezi Sampofu.

Minzi yekwalezwi kiyecwake ka Nankuntwe, Muzii, Mpukano ni Namiyundu. Sampofu naize minzi yeo ikonwa feela kufitwa teñi kamikolo kapa lonji. 

Nihaike likolo halisika kwala kale bakeñisa muunda, Sampofu naize katengo kasikiliti kasweli kulukisa matente haiba likolo inge litasezwa. 

“Haiba likolo inge lipotolohiwa kimuunda kapa haiba mezi akambama falikolo, luswanela kututisa baituti. 

Bashemi hañata bahana kututa. Basebelisa mikolo kuisa banababona kwalikolo. Halulati kulatehelwa kibatu. Haluswaneli kusiya banana inge bafuluha mikolo, kihande habasindeketwa kibashemi babona,” naelelize. 

Sampofu hape naelelize balimi kuisa likomu zabona kwamibu yelumbile.