Babanca babasalati kupendiwa bababata kukena misebezi mwasisole, nebaiketezi kukala kuleka makadi amupendo waCovid-19 abuhata kuli batambeke hamoho ni mañolo akukupa misebezi.
Muuna walilimo zemashumi amalalu kazesilezi yakulubelwa kuba muhatisi wamakadi ao natamilwe Labubeli, kasamulaho akufumaniwa ababaza pisinisi yahae kwabaleki.
Liviki zepeli zefelile Liluko la Sisole nelikile latalusa kuli bayahi banaha Namibia babali mwalilimo ze 18 kuisa kuze 25 pili la 31 Sikulu 2022, bane bapasize sitopa sa 12 kalinepo zelikana 25, batambeke mañolo akukupa misebezi mwasisole.
Kono mañolo ao nana ni kusindeketwa kikadi yamupendo waCovid-19. Kalulo yeo ikulubelwa kuli nesundile babanca babasika pendiwa kuyolwanela makadi abuhata.
Yakulubelwa natamilwe kwasintolo sahae sakuhatiseza mwakomponi ya Goreagab, kwane apatehile kuhatisa makadi abuhata niku alekisa.
Sibuabui wasipokola mwasikiliti sa Khomas Silas Shipandeni nanyatezi kutamiwa kwahae.
Yakulubelwa yo libizo lahae nelisika patalazwa, ubihiwa kuli nalekisa kadi ni kadi N$500.
Mapokola nebaize nebalumilwe zebe kimuyahi yomuñwi. Yakulubelwa nalibelezwi kubonahala mwakhuta viki yefelile.
Muzamaisi Yomuhulu walikolo la makete Ben Nangombe naize likolo linyaza likezo zakulekisa makadi abuhata.
“Taba yeo hailumelelwi, mi haiswaneli,” nekubulezi Nangombe.
Nabulezi kuli kaufela yaeza cwalo ukafetulwa mutala kubabañwi. “Likolo nelisika lumelela mutu kulekisa makadi amupendo waCovid-19. Kibubangoki bobutuna, kacwalo yaeza cwalo uswanela kutamiwa kapilipili,” nabulezi.
Naelelize Sicaba kulatelela litaelo zelukela zaliluko hakutaha kwakupendiwa.
“Makadi aCovid-19 afelwa kwalibaka zakupendelwa mi afiwa mahala,” nekubulezi Nangombe.
Buñata bwa bayahi banaha Namibia baicanganisize hala kupendiwa mupendo waCovid-19, kuzwelela mungendenge haukala mwakweli ya Liatamanyi 2021, nihaike sekutimezi babalikana 4 060 kwabutuku bwa Covid-19.
Lipiho libonisa kuli kibabalikana 439 842 feela babafumani mupendo kakutalelela, ili kuyemela 24.7% yanombolo yene lelilwe kupendiwa.
Litaelo kaufela zeamana ni bukutu bwa Covid-19 neli felisizwe kimubuso, kono sicaba sisa susuezwa kulatelela litaelo zamakete ni sicaba.